Hazırda “Gen.G” komandasının “League of Legends” heyətində çıxış edən Park “Ruler” Ce Hyok ciddi hüquqi qalmaqalın mərkəzindədir. “Inven” portalının yaydığı məlumata görə, Cənubi Koreyanın vergi orqanları ulduz oyunçunu vergidən yayınmaqda təqsirli bildikdən sonra LCK liqası ona qarşı rəsmi araşdırmaya başlayıb.
LCK reqlamentinə əsasən, bu növ qanun pozuntuları üçün olduqca sərt intizam sanksiyaları nəzərdə tutulub. Belə ki, “Ruler” 100 milyon von (təxminən 56 900 avro) məbləğində cərimə oluna və ya LCK və LCK CL yarışlarında iştirakdan ömürlük kənarlaşdırıla bilər.
Hazırda liqa rəhbərliyi vergi orqanlarının qərarını və hadisənin təfərrüatlarını araşdırır. Əgər ittihamlar tam təsdiqini taparsa, Worlds 2017-nin qalibi olan kiberidmançının karyerası böyük təhlükə altına düşəcək.
