IEM Cologne Major 2026-nın üçüncü mərhələsində (Stage 3) ilk dövrənin oyunlarına start verilib. Açılış matçlarında BB Team və 9z Team kollektivləri gərgin keçən rəqabətin sonunda qələbə qazanaraq turnirə uğurlu başlanğıc ediblər.
Matçların nəticələri və xəritələr
BB Team 2:1 The MongolZ Günün ilk qarşılaşmasında BB asan olmayan bir qələbəyə imza atdı. Komanda Dust2 xəritəsində rəqibinə minimal hesabla uduzsa da (11:13), növbəti xəritələrdə geri dönüş etməyi bacardı. Mirage xəritəsində rahat üstünlük qazanan (13:6) heyət, həlledici Ancient döyüşündə də (13:11) rəqibini sıxışdıraraq seriyada nöqtəni qoydu.
9z Team 2:1 PARIVISION Paralel keçən digər görüşdə Cənubi Amerika kollektivi “9z” sevinən tərəf oldu. Onlar Overpass xəritəsində rəqibə sadəcə 1 raund verərək darmadağın etdilər (13:1). Növbəti xəritə olan Dust2-də (8:13) büdrəsələr də, həlledici Inferno qarşılaşmasında (13:9) oyunun cilovunu yenidən ələ alıb vacib xalı nağdlaşdırdılar.
Turnir cədvəlində son vəziyyət
Bu nəticələrdən sonra BB Team və 9z Team turnirdəki göstəricilərini 1-0 statusuna çatdıraraq liderlər səbətinə yerləşiblər. The MongolZ və PARIVISION isə ilk məğlubiyyətlərini alaraq mübarizəyə 0-1 səbətindən davam edəcəklər.
Meycor haqqında ümumi məlumat “IEM Cologne Major 2026” turniri 2-21 iyun tarixlərində Almaniyanın Köln şəhərində keçirilir. Dünyanın ən güclü 32 komandası 1 250 000 dollar ($1 250 000) məbləğində nəhəng mükafat fondu uğrunda barışmaz mübarizə aparır. Çempionat ümumilikdə dörd ardıcıl mərhələdən ibarətdir: Stage 1, Stage 2, Stage 3 və yekun pley-off mərhələsi.
