Braziliya komandası “Legacy” Çinin Suçjou şəhərində keçirilən CS2 üzrə “FISSURE Playground 3” turnirinin çempionu olub. Həlledici böyük final matçında “Legacy” “G2” kollektivini 3:0 hesabı ilə darmadağın edib.
Braziliya heyəti üçün bu, “CS Asia Championships 2025” və “CS Asia Championships 2026” uğurlarından sonra Çin səhnəsində qazanılan artıq 3-cü kubokdur.
Xəritələrin nəticələri və “latto”dan inanılmaz MVP performansı
Ən gərgin mübarizə ilk iki xəritədə yaşanıb: “Ancient” 13:9, “Mirage” isə 13:10 hesabı ilə başa çatıb. Həlledici “Dust2” xəritəsində isə “Legacy” startdan etibarən tam üstünlük nümayiş etdirərək oyunu 13:4 hesabı ilə darmadağınla yekunlaşdırıb.
Turnirin ən yaxşı oyunçusu (MVP) adına 23 yaşlı Bruno “latto” Rebelatto layiq görülüb. O, hər üç xəritədə ən yaxşı kiberidmançı olub və finalı inanılmaz 1.67 reytinqlə tamamlayıb. “G2” heyətində yalnız Qay “NertZ” İluz nisbi müqavimət göstərə bilib (1.23 reytinq), ukraynalı snayper Artem “r1nkle” Moroz isə son dərəcə uğursuz seriya keçirərək matçın ən aşağı göstəricisi (0.63) ilə yadda qalıb.
Bu qələbə təşkilatı tarixlərindəki ən yaxşı göstərici olan VRS dünya reytinqinin 3-cü pilləsinə yüksəldib.
