Electronic Arts şirkəti Battlefield REDSEC Elite və Battlefield REDSEC Open turnir seriyalarının başladıldığını elan edib.
Battlefield REDSEC Elite turnirində Amerika, EMEA regionu və Asiya-Sakit okean regionundan 50 komanda kapitanı iştirak edəcək. Hər kapitan dörd nəfərlik heyət formalaşdıracaq. Seçmə mərhələlərinin hər günü 6 Battle Royale matçından ibarət olacaq və ən yaxşı 8 komanda yekun qalibi müəyyən edəcək Gauntlet mərhələsinə vəsiqə qazanacaq. Seriyanın bütün mərhələləri onlayn keçiriləcək.
Amerika regionunda seçmə oyunlarının hər günündə 50 min ABŞ dolları oynanılacaq, mövsüm finalında çıxış edən komandalar arasında isə ümumilikdə 500 min dollar bölüşdürüləcək.
EMEA və APAC regionlarının seçmə günlərində ümumi mükafat fondu 20 min dollar, mövsüm finalı üçün ayrılan məbləğ isə 285 min dollar olacaq.
REDSEC Elite seriyasının ilk oyun günü 10 dekabrda, hər region üzrə mövsüm finalları isə 18 dekabrda baş tutacaq.
REDSEC Open isə hər üç regiondan olan bütün oyunçulara qatılmaq imkanı verir. Üç gün ərzində oynanılan 10 Battle Royale və 10 Gauntlet matçında ən yüksək ümumi xalı toplayan 250 ən yaxşı komanda 17 yanvar 2026-cı ildə keçiriləcək mövsüm finalına yüksələcək. Hər regionda final zamanı 10 min dollar mükafat fondu oynanılacaq.
