Legacy təşkilatı “Fluxo” komandasından Andrey “arT” Piovezanı transfer etdiyini rəsmən elan edib. O, bu yaxınlarda ehtiyat oyunçular skamyasına göndərilən Lukas “lux” Meneqinini əvəzləyərək komandanın yeni oyun daxili lideri (IGL) olub.

Heyətdəki bu dəyişiklik Braziliya kollektivinin mövsümə uğursuz start verməsi, xüsusən də IEM Krakow turnirinin ilk mərhələsində sonuncu yeri tutması ilə əlaqədardır. 2025-ci ilin uğurlu keçməsinə baxmayaraq, yeni mövsümün başlanğıcındakı zəif nəticələr Legacy rəhbərliyini kadr islahatlarına getməyə məcbur edib.

arT əvvəllər bir il yarımdan çox müddət ərzində “Fluxo”ya rəhbərlik edib və bu müddət ərzində komanda ilə iki dəfə Meycor turnirinə vəsiqə qazanıb. O, yeni komandasında dərhal debüt etməyəcək, çünki PGL Cluj-Napoca turnirində Legacy-ni “FUT” komandası əvəzləyib. Kollektivin iştirak edəcəyi növbəti turnir 1 martda start götürəcək ESL Pro League Season 23 olacaq.

4 fevral tarixində CS2 üzrə keçirilən IEM Kraków 2026 turnirinin qrup mərhələsi başa çatıb. Çempionluq uğrunda mübarizəni davam etdirəcək ən güclü altı komanda müəyyənləşib.

Dörddəbir finalda bizi Aurora – FURIA və G2 – MOUZ cütlüklərinin qarşılaşması gözləyir. Vitality və Spirit komandaları isə qrup mərhələsindəki uğurlu çıxışları sayəsində pley-offa birbaşa yarımfinaldan start verəcəklər.

IEM Kraków 2026 pley-off cədvəli (Bakı vaxtı ilə +2 saat):

Dörddəbir final (6 fevral)

• 18:45 Aurora – FURIA
• 22:00 G2 – MOUZ

Yarımfinal (7 fevral)

• 18:45 (Rəqiblər dəqiqləşəcək)
• 22:00 (Rəqiblər dəqiqləşəcək)

Final və 3-cü yer uğrunda matç (8 fevral)

• 16:30 3-cü yer uğrunda matç
• 20:00 Qrand-final

IEM Kraków 2026 turniri 28 yanvar – 8 fevral tarixlərində Polşanın Krakov şəhərində keçirilir. Turnirin ümumi mükafat fondu 1.25 milyon dollar təşkil edir.

Tanınmış peşəkar oyunçu k0nfig, “Bootcamp” podkastının xüsusi buraxılışında karyerası ərzində aldığı maaşlarla bağlı maraqlı detalları paylaşıb. Müsahibə zamanı o bildirib ki, Astralis komandasında çıxış etdiyi dövrdə aylıq gəliri təxminən 175 min Danimarka kronu olub. Həmin vaxt oyunun ona artıq zövq verməməsinə baxmayaraq, maliyyə şərtləri olduqca cəlbedici idi.

Daha maraqlı bir hadisə isə onun Complexity komandasına keçidi ilə bağlıdır. Başlanğıcda komanda rəhbərliyi ona ayda 15 min dollar maaş təklif edib. Lakin komanda yoldaşı blameF-in ondan iki dəfə çox — 30 min dollar aldığını öyrənən k0nfig, maaşı artırılana qədər müqaviləni imzalamaqdan imtina edib.

Complexity-nin direktoru Jason Lake əvvəlcə bu yanaşmadan narazı qalsa da, bir neçə gündən sonra yeni şərtlə razılaşıb və k0nfig-ə aylıq 30 min dollar maaş nəzərdə tutan müqaviləni göndərib. k0nfig ilə baş tutan söhbətin tam versiyasını “Bootcamp” podkastının xüsusi buraxılışında dinləmək mümkündür.

FURIA Esports kollektivi CS2 üzrə keçirilən IEM Krakow 2026-nın qrup mərhələsində “Natus Vincere” (NaVi) komandasına qalib gəlib. Gərgin keçən qarşılaşma xəritələr üzrə 2:1 hesabı ilə braziliyalıların xeyrinə başa çatıb (Mirage 13:7; Inferno 9:13; Dust2 13:6).

Bu qələbə sayəsində FURIA Esports A qrupunun aşağı səbətində növbəti mərhələyə yüksəlib. Komanda pley-offa vəsiqə uğrunda 3 fevral tarixində, Bakı vaxtı ilə saat 17:30-da (MSK 16:30) Astralis ilə üz-üzə gələcək.

Natus Vincere isə FUT Esports, NRG Esports, PARIVISION və The MongolZ kollektivlərinin ardından IEM Krakow 2026 turniri ilə vidalaşıb. Komanda yarışı 13-16-cı yerlərdə tamamlayaraq 10 min dollar mükafat qazanıb.

IEM Krakow 2026 turniri 28 yanvar – 9 fevral tarixlərində Polşanın Krakov şəhərində LAN formatında keçirilir. Turnirin ümumi mükafat fondu 1,25 milyon dollar təşkil edir.