Epic Games Store platformasında bahar endirimləri rəsmi olaraq start götürüb. Aksiyanın bir hissəsi olaraq minlərlə oyun 75%-dək endirimlə təqdim olunur. Endirimlər həm məşhur AAA layihələrini, həm də unikal indie oyunları əhatə edir.

Seçilmiş oyunlarda təklif olunan endirimlərdən bəziləri:

• Sherlock Holmes The Awakened – 80% endirim
• Sherlock Holmes: Crimes and Punishments – 90% endirim
• Red Dead Redemption – 20% endirim
• S.T.A.L.K.E.R. 2: Heart of Chornobyl – 15% endirim
• Dragon Age: The Veilguard – 50% endirim
• Ghost of Tsushima Director’s Cut – 33% endirim
• EA Sports FC™ 25 Standard Edition – 70% endirim
• Cyberpunk 2077 – 60% endirim
• God of War – 60% endirim
• God of War Ragnarök – 20% endirim
• Creaks – 70% endirim

Bahar kampaniyası 9 aprel tarixinə qədər davam edəcək.

Portuqaliyalı futbol əfsanəsi, “Ən-Nəsr” klubunun və Portuqaliya millisinin kapitanı Kriştianu Ronaldu döyüş oyunları dünyasına qədəm qoyur. O, Fatal Fury: City of the Wolves adlı klassik döyüş oyun seriyasının yeni buraxılışında oyunçu obrazı kimi təqdim olunacaq.

Bu qeyri-adi krossover rəsmi olaraq 40 yaşlı futbolçunun sosial media hesabında elan edilib. Oyunçular Ronalduya məxsus xüsusi döyüş texnikaları ilə yanaşı, onun məşhur qol sevinci “Siuuu”nu da oyunda görə biləcəklər – bu, qələbədən sonra avtomatik olaraq səhnələşdiriləcək.

Dünya futbol ulduzunun belə bir formatda görünməsi klassik Fatal Fury seriyasının canlanmasına marağı artıracaq mühüm hadisə kimi qiymətləndirilir. Ronaldu obrazının əlavə edilməsi oyunun həm yeni, həm də veteran fanatları üçün sürpriz olub.

Fatal Fury: City of the Wolves – SNK studiyasının hazırladığı ikölçülü döyüş oyunu seriyasının növbəti hissəsidir. Oyun 24 aprel tarixində PS4, PS5, Xbox Series X|S və PC platformaları üçün satışa çıxarılacaq.

Hazırda, 26–31 mart tarixlərində açıq beta-test mərhələsi keçirilir. Bu müddət ərzində oyunçular 9 fərqli döyüşçünü sınaqdan keçirə bilərlər:

• Izoc
• Kain R. Heinlein
• Rock Howard
• Terry Bogard
• Hotaru Futaba
• Jenet
• Mai Shiranui
• Preecha
• Vox Reaper

CD Projekt şirkəti rəsmi olaraq bildirib ki, məşhur The Witcher 4 oyununun 2026-cı ilin sonunadək buraxılması planlaşdırılmır. Bu da o deməkdir ki, oyun ən tez 2027-ci ildə oyunçuların ixtiyarına veriləcək.

2024-cü ilin maliyyə hesabatının təqdimatı zamanı şirkət nümayəndələri qeyd ediblər ki, layihə rəhbərliyi üçün nəzərdə tutulmuş stimullaşdırıcı proqramın birinci mərhələsi başa çatana qədər – yəni 2026-cı ilin sonunadək – oyun tamamlanmayacaq.

CD Projekt-in maliyyə direktoru Pyotr Nelyuboviç bildirib:

“Hazırda dəqiq buraxılış tarixini açıqlamağa hazır deyilik. Yeganə bildiyimiz budur ki, oyun stimullaşdırma proqramımızın ilk mərhələsi çərçivəsində çıxmayacaq.”

2024-cü ilin noyabrında studiya oyunun tammiqyaslı istehsal mərhələsinə keçdiyini bildirsə də, daha ehtiyatlı marketinq siyasətini seçdiyini vurğulamışdı. Lakin dekabrda The Game Awards tədbirində yayımlanan təsirli kinotik tizer fanatlarda 2026-cı ildə buraxılış ümidi yaratmışdı.

Artıq bu ehtimallar rəsmi olaraq təkzib olunub. Oyunçular The Witcher dünyasının yeni bölümü üçün daha uzun müddət gözləməli olacaqlar.

2025-ci ilin payızında buraxılması gözlənilən Grand Theft Auto 6 oyunu oyun sənayesində əməlli-başlı səs-küy yaradıb. Oyunun dəqiq çıxış tarixi hələ açıqlanmasa da, artıq bir neçə iri yayımçı öz layihələrinin reliz tarixlərini dəyişdirməyi və ya təxirə salmağı planlaşdırır. Səbəb isə sadədir – GTA 6 ilə eyni vaxtda bazara çıxmaq risklidir.

The Game Business nəşrinin məlumatına görə, bir sıra oyun istehsalçıları və yayımçıları strateji qərarlar qəbul edir. Onlardan bəziləri planlaşdırılmış relizlərini başqa tarixə keçirir, digərləri isə canlı xidmət əsasında işləyən oyunlara nəzərdə tutulan böyük yeniləmələri təxirə salır.

Bununla bağlı bir şirkətin rəhbəri belə deyib:

“Biz GTA 6 ilə eyni dövrdə olmaq istəmirik. Fərqli layihələrimiz üçün bir neçə ehtiyat planımız var.”

Digər sənaye nümayəndələri də qeyd edir ki, hətta GTA 6 olmasa belə, reliz üçün uyğun vaxt seçmək çox çətindir. Bir Avropa AAA-yayımçısının yüksəkvəzifəli şəxsi bildirir:

“Oyunu GTA 6-dan əvvəl buraxsan, dolu yay bazarı ilə rəqabət aparırsan. Əgər geciksən, bu dəfə ‘Qara Cümə’ endirimlərinə düşürsən. Hər iki halda da risk var.”

Belə görünür ki, sənaye GTA 6 oyununu bir növ “nəhəng meteorit” kimi qəbul edir və hər kəs onun zərbə zonasından yayınmağa çalışır.

Təxirə salınmalar yalnız kiçik və orta studiyalarla məhdudlaşmır. Elektron Arts-ın baş direktoru Endryu Vilson da bu ilin əvvəlində növbəti Battlefield oyununun reliz tarixinin dəyişə biləcəyini və bunun arxasında “böyük gələcək reliz”in dayandığını bildirib. İzləyicilər bu qeydin GTA 6 ilə bağlı olduğunu düşünür.

Amma burada başqa bir təhlükə də var: GTA 6-nın özü də 2026-cı ilə təxirə salına bilər. Bu isə digər oyun istehsalçılarının reliz planlarını bir daha alt-üst edə bilər.

Bir yayımçının sözlərinə görə:

“Əgər biz oyunumuzu 2025-dən təxirə salsaq və Rockstar da eyni addımı atsa, nə olacaq? Hər şeyi yenidən dəyişməli olacağıq? Bu, ciddi gərginlik yaradır.”