Polşalı The Farm 51 studiyası, postapokaliptik RPG shooter olan Chernobylite 2: Exclusion Zone üçün kinomatoqrafik trailer yayımlayaraq oyunun erkən giriş tarixini açıqladı. Oyun 6 martda Steam-də erkən giriş rejimində təqdim olunacaq.
Chernobylite 2, apokaliptik hadisələr fonunda açıq dünyada keçən bir RPG shooter-dir. Əsas qəhrəmanımız, keçmiş hərbi xidmətçi Kole Gray, Planewalker təşəbbüsünə qoşularaq paralel dünyaya səyahət edir və nadir Chernobylite maddəsinin axtarışına düşür. Missiyasını yerinə yetirərkən, Kole oyunun ən qaranlıq və təhlükəli məkanı hesab olunan Çernobılın Qadağan Zonasında tapılır.
Hal-hazırda Kickstarter kampaniyası davam etsə də, layihə artıq tələb olunan 98 min dolları toplayıb və əlavə olaraq dörd hədəfə də nail olub. Xəbərin yayımlandığı anda ümumi dəstək məbləği 167 min dolları aşmışdır. Bütün dəstəkçilərə isə oyunun Steam nüsxəsi təqdim ediləcək.
Steam-in məlumatına görə, oyuna rus dilində altyazılar əlavə olunacaq və Rusiya bazarında da çıxış edəcək. Oyunun qiyməti hələ açıqlanmayıb.
