Çin Futbol Assosiasiyası futbol simulyatorları üzrə milli kiberidman yığmasının yaradılacağını elan edib. Yeni komanda FIFA və Asiya Futbol Konfederasiyası (AFC) çərçivəsində keçirilən beynəlxalq turnirlərdə iştirak edəcək.
Rəsmi açıqlamaya əsasən, assosiasiya bu təşəbbüsün reallaşdırılması üçün lazım olan əməkdaşlıq sahələrini müəyyən edib. Onlara oyunçular üçün məşq bazalarının yaradılması, logistika, eləcə də komandanın beynəlxalq yarışlara qatılması üçün maliyyələşdirmə daxildir.
Çində virtual futbol sahəsində kiberidman sürətlə inkişaf edir. 2021-ci ildə yerli Premyer Liqa Tencent ilə tərəfdaşlıq edərək ePremier League adlı regional turnir təşkil edib. Bundan əlavə, FC Online China Pro League və digər EA Sports FC ekosisteminə daxil olan yarışlar da uğurla keçirilir.
