FIFA öz futbol seriyasının yeni oyununu anons etdi, lakin bu layihə klassik simulyator həvəskarlarının gözləntilərini çətin ki, qarşılasın.
2022-ci ildə Beynəlxalq Futbol Federasiyası, iyirmi ildən çox müddət ərzində FIFA brendi altında oyunlar buraxan Electronic Arts ilə çoxillik əməkdaşlığına son qoymuşdu. İndi isə təşkilat Netflix ilə razılaşma imzalayıb. Məhz bu media nəhəngi yeni futbol simulyatorunun naşiri olacaq və eyni zamanda ABŞ, Kanada və Meksikanın ev sahibliyi edəcəyi 2026-cı il Dünya Çempionatının sponsorlarından birinə çevriləcək.
Yeni FIFA-nın əsas xüsusiyyətlərindən biri eksklüzivlikdir: oyun yalnız Netflix abunəçiləri üçün əlçatan olacaq və smartfonlarda, planşetlərdə və smart TV-lərdə fəaliyyət göstərən Netflix Games kataloquna daxil ediləcək.
Daha bir vacib detal isə dərin idman simulyatorlarının pərəstişkarlarını məyus edə bilər. Yeni FIFA, “sevdiyiniz komandanı bir düymə ilə idarə etmək” mümkün olsun deyə, maksimum dərəcədə kazuallıq (sadəlik) prinsipləri əsasında yaradılır.
Layihənin hazırlanması ilə Delphi Interactive studiyası məşğul olur. Bu studiyanın özünə məxsus müstəqil buraxılışları yoxdur və autsors podratçı kimi fəaliyyət göstərir; o cümlədən, 007: First Light oyununun yaradılmasında IO Interactive-ə köməklik edir.
FIFA və Netflix futbol simulyatoru haqqında əlavə məlumatların 2026-cı ildə açıqlanacağı vəd edilir.
