Rockstar Games və Take-Two Interactive-in Grand Theft Auto 6-nın onlayn komponentini əsas oyundan ayrıca satmağı planlaşdırdığı bildirilir. Bu barədə etibarlı məlumat sızdırıcısı Tez2 xəbər verib.
Mənbənin məlumatına görə, GTA 6 çıxan zaman oyunçular iki seçim arasında qərar verə biləcəklər:
- GTA 6-nın tam versiyası – tək oyunçu rejimi və GTA Online birlikdə.
- Yalnız GTA Online – süjet rejimi olmadan, sadəcə onlayn versiya.
Bu model Rockstar-ın əvvəlki təcrübəsinə uyğundur. Belə ki, şirkət GTA 5-in onlayn hissəsini ayrıca satışa çıxarıb, həmçinin Red Dead Redemption 2-nin onlayn versiyasını da əsas oyundan ayıraraq təqdim edib.
Yeni GTA Online-un qiyməti hələ açıqlanmayıb, lakin iddialara görə, Rockstar onlayn və süjet rejimi birlikdə təqdim olunan paketlərin qiymətini daha cəlbedici etməyə çalışacaq.
Bəzi şayiələrə görə, GTA 6-nın standart versiyası 100-150 dollar arasında qiymətləndirilə bilər, lakin Tez2 bu ehtimalı az mümkün hesab edir. O, yalnız erkən giriş imkanı olan xüsusi nəşrin bu qiymətə satıla biləcəyini düşünür.
Grand Theft Auto 6-nın rəsmi buraxılışı 2025-ci ilin payızına planlaşdırılıb, lakin bəzi mənbələr oyunun 2026-cı ilə ertələnə biləcəyini bildirir.
