Məşhur oyun insayderi Tom Henderson Prince of Persia: The Sands of Time Remake barədə yeni detallar paylaşıb. Bir müddət əvvəl o, 2020-ci ildə ilk dəfə elan olunan yenilənmiş versiyanın 2026-cı ilin yanvar ayının ortalarında çıxacağını bildirmişdi. İndi isə o, daha dəqiq tarix səsləndirib.
Insider Gaming podkastında Henderson qeyd edib ki, remeykin relizi 16 yanvar 2026-cı il üçün planlaşdırılır. Onun sözlərinə görə, Ubisoft bu tarixi ilin əsas oyun şousu sayılan The Game Awards 2025-də rəsmi şəkildə açıqlamaq niyyətindədir. O hesab edir ki, TGA bunun üçün “ideal səhnə”dir – əlbəttə, əgər şirkət çıxışını digər gurultulu anonsların fonunda itirməkdən çəkinməsə.
Bununla belə, başqa bir insayder — NateTheHate — bu sızmaya şübhə ilə yanaşır. O, remeykin TGA 2025-də göstəriləcəyinə inanmır, baxmayaraq ki, bir müddət əvvəl Ubisoft sosial şəbəkələrində gələcək elanla bağlı poster paylaşmış və sonra onu silmişdi. Bəzi ehtimallara görə, şirkət oyunu əlavə reklam kampaniyası olmadan, sakit “shadow drop” formatında buraxa bilər. Bu yanaşmanı bu ilin aprelində Bethesda tətbiq etmiş, gözlənilmədən The Elder Scrolls IV: Oblivion Remastered-i satışa çıxarmışdı. Lakin Ubisoft indiyədək belə taktika istifadə etmədiyindən, çoxları Hendersonun versiyasını daha real hesab edir.
The Game Awards 2025 Avropa vaxtı ilə 12 dekabrın erkən saatlarında başlayacaq, yəni çox yaxın zamanda kimin haqlı olduğu üzə çıxacaq.
Remeykin hazırlanma prosesi də asan olmayıb. Layihə ilk olaraq Ubisoft India studiyasına həvalə olunmuşdu, lakin işin keyfiyyəti gözləntiləri qarşılamadığı üçün layihə Ubisoft Montréal komandasına verildi. Studiyaya demək olar ki, oyunu tamamilə sıfırdan yenidən hazırlamaq lazım gəlib.
İlk təqdimat treyleri o qədər zəif qarşılanmışdı ki, həm oyunçular, həm də media tərəfindən kəskin tənqid olunmuş, daha sonra isə rəsmi kanallardan ümumiyyətlə silinmişdi. Məhz buna görə, yeni göstəriləcək materiallara maraq və tələbat indi daha da yüksəkdir.
