Tanınmış oyun sənayesi insayderi billbil-kun EA Sports-un məşhur Madden NFL seriyasının yeni oyunu olan Madden NFL 26-nı 14 avqust 2025-ci ildə buraxmağı planlaşdırdığını açıqlayıb. EA tərəfindən hələ rəsmi təsdiq gəlməsə də, bu mənbənin keçmişdəki dəqiq proqnozları oyunsevərlər arasında ciddi maraq yaradıb.
İnsayderə görə, Deluxe versiya sahibləri üçün oyun 11 avqustdan etibarən erkən girişlə əlçatan olacaq. EA Play abunəçiləri, həmçinin Xbox Game Pass Ultimate istifadəçiləri, eyni tarixdən başlayaraq 10 saatlıq demo ilə oyunu sınaya biləcəklər.
Oyun NFL mövsümünə sinxron buraxılır
Madden NFL 26-nın buraxılış tarixi NFL-in rəsmi mövsümöncəsi oyunları ilə eyni vaxta təsadüf edir. Bu isə oyunun reklamı və qəbuluna müsbət təsir edəcək strateji addım kimi qiymətləndirilir.
Hansı platformalarda olacaq?
Hazırda oyun üçün təsdiqlənmiş platformalar:
- PlayStation 5
- Xbox Series X|S
- PC
Ancaq maraqlı sual odur ki, Nintendo platformalarına geri dönüş olacaqmı? EA bu yaxınlarda Nintendo Switch 2 üçün də oyun hazırladıqlarını qeyd etmişdi. Əgər bu baş verərsə, Madden seriyası 2012-ci ildən sonra ilk dəfə Nintendo oyunçuları ilə yenidən görüşəcək.
PS4 və Xbox One dəstəyi sual altındadır
F1 25 oyununun köhnə konsolları dəstəkləməməsindən sonra ehtimallar artır ki, EA Madden NFL 26 üçün də PS4 və Xbox One platformalarını nəzərə almayacaq.
Rəsmi məlumatın yaxın günlərdə EA tərəfindən açıqlanacağı gözlənilir.
