Almaniyanın MOUZ komandası ilə final qarşılaşması 3:1 hesabı ilə başa çatdı.
Ukrayna kibersport təşkilatı Natus Vincere (NAVI), IEM Rio 2024 üzrə Counter-Strike 2 turnirinin finalında MOUZ komandasına qalib gəldi. Matç 3:1 hesabı ilə başa çatdı.
Oyun MOUZ tərəfindən seçilən Inferno xəritəsində başladı. NaVi oyuna qeyri-müəyyən başladı və ilk yarıda geri qaldı. Ancaq tərəflər dəyişdikdən sonra NaVi gücünü göstərdi və qələbəni ələ keçirdi. Növbəti oyun isə Natus Vincere tərəfindən seçilən Dust 2 xəritəsində oynandı. Burada Ukrayna komandası tamamilə dominant idi və yalnız iki raundu rəqibə verdi.
Üçüncü xəritə Mirage oldu və burada MOUZ ciddi müqavimət göstərdi. Oyun gərgin və bərabər səviyyədə keçsə də, həlledici anlarda NAVI snayperi İqor “w0nderful” Jdanovun kifayət qədər dəqiqliyi çatmadı. Nəticədə, MOUZ seriyada fərqi azaltdı.
Sonuncu və həlledici xəritə Ancient oldu. MOUZ 10:2 hesabı ilə öndə olsa da, Natus Vincere inanılmaz bir geri dönüş edərək oyunu öz xeyrinə tamamladı və Rio kubokunu qazandı.
Turnirdəki qələbəyə görə NAVI 100 min dollar və IEM Katowice 2025-ə vəsiqə qazandı. Bu, komandanın 2024-cü ildəki yeddinci, ardıcıl altıncı finalı idi.
Natus Vincere heyəti:
- Valeri “b1t” Vaxovski
- Yustinas “jL” Lekaviçus
- Aleksey “Aleksib” Virolaynen
- Mixay “iM” Ivan
- İqor “w0nderful” Jdanov
- Andrey “B1ad3” Gorodenski (məşqçi)
Turnirdən sonra HLTV portalı rumıniyalı oyunçu iM-i IEM Rio 2024-ün ən dəyərli oyunçusu (MVP) elan etdi. O, turniri 1.15 reytinqlə başa vurdu və finalda MOUZ-a qarşı qələbədə əsas rol oynadı. Bu, iM-in karyerasında ilk MVP mükafatı oldu.
NaVi oyunçusu Aleksey “Aleksib” Virolaynen qələbədən sonra öz fikirlərini bölüşdü. Aleksib yaxın zamanda yaxın bir insanını itirdiyini və oyunun gedişatında emosiyalarını idarə etməyə çalışdığını etiraf etdi.
“Bu qələbə xüsusi idi. Mən yaxın bir insanımı itirdim və bütün oyun boyunca emosiyalarımı idarə etməyə çalışdım. Sevdiklərinizi qucaqlayın.”
