“Pokémon” kainatına aid olan yeni “Pokémon Champions” oyunu üçün təzə treyler təqdim edilib. Tərtibatçılar videoda oyunun əsas mexanikalarını və dəqiq çıxış tarixini açıqlayıblar.
Oyun 8 aprel 2026-cı il tarixində işıq üzü görəcək. Layihə “Nintendo Switch”, “Android” və “iOS” platformaları üçün əlçatan olacaq. “Pokémon Champions” “Free-to-start” (məhdud funksionallı pulsuz yükləmə, tam versiya üçün ödəniş tələb edən model) sistemi ilə yayılacaq.
Seriyanın əsas oyunlarından fərqli olaraq, “Pokémon Champions” tamamilə onlayn döyüşlərə fokuslanıb. Burada açıq dünya və ya əraziləri kəşf etmək kimi elementlər yoxdur. Əsas diqqət reytinqli qoşa döyüşlərə ayrılıb. Oyun mexanikası klassik versiyalarda olduğu kimi “turn-based” (sıralı gedişli döyüş sistemi) olaraq qalır. Oyunçular öz komandalarının heyətini tamamilə fərdiləşdirə, bacarıqları və xarakterləri seçə, hətta xüsusiyyət xallarını sərbəst şəkildə bölüşdürə bilərlər.
Oyunda vəhşi pokemonların ovlanması funksiyası olmadığı üçün istifadəçilər sevimli personajlarını ya “Pokémon HOME” vasitəsilə köçürə, ya da daxili “Recruit” (işə götürmə) funksiyasından istifadə edə bilərlər. Treyler “Mega Evolution” (meqa-təkamül) sisteminin geri qayıtdığını da təsdiqləyib. Bəzi pokemonlar franşizada əvvəllər heç vaxt görünməmiş yeni formalar və unikal bacarıqlar qazanacaqlar.
