Capcom-un məşhur qorxu oyun seriyası Resident Evil yeni mərhələyə qədəm qoyur. Sosial şəbəkələrdə və oyun mediada yayılan məlumatlara əsasən, Resident Evil 9-da oyunçuları yeni qəhrəman, RPG elementləri və RE7-dəki kimi qorxulu atmosfer gözləyir.
Yeni rejissor və tanış tərz
Yeni layihənin rejissoru Kosi Nakanisi olacaq — o, daha əvvəl Resident Evil 7, Resident Evil: Revelations və The Mercenaries 3D üzərində çalışıb. Onun sözlərinə görə, RE9 bir tərəfdən “Revelations” üslubunda qurulacaq, digər tərəfdən isə əsas seriyanın süjet xəttinə bağlanacaq.
Rejissor bildirib:
“Oyunçular tamamilə yeni qəhrəmanla tanış olacaq. Süjetdə gözlənilməz tərəflər olacaq və qorxu atmosferası yenidən əsas rola qayıdacaq.”
Süjetdən ilk detallar
İlk treylerdə görünən sarısaçlı qadın qəhrəman, FBI əməkdaşı olaraq müəmmalı ölüm hadisələrini araşdırır. Lakin hadisələrin gedişində o, özünü cərrahiyyə masasında tapır. Süjetdə qəhrəmanın anasının faciəli ölümü də xatırlanır — bu, oyunun emosional və dramatik xəttini daha da gücləndirəcək.
Texniki tərəf və platformalar
- Rəsmi reliz tarixi: 27 fevral 2026
- Platformalar: PC, PlayStation 5, Xbox Series X/S
- Oyun Capcom RE Engine mühərrikində hazırlanır və yüksək keyfiyyətli vizuallar, səslər və performans vəd edir.
Resident Evil 9, seriyanın qorxu köklərinə dönüş etməklə bərabər, RPG mexanikası və yeni süjet qatları ilə təcrübəni yeniləyəcək.
