Səudiyyə Ərəbistanının Team Falcons kiberidman təşkilatı şahmat bölməsini açdığını və amerikalı qrossmeyster Hikaru Nakamura ilə müqavilə imzaladığını elan edib. Klub bu xəbəri rəsmi sosial media hesablarında paylaşaraq şahmatın e-idman sahəsindəki artan əhəmiyyətini vurğulayıb.
Hazırda 37 yaşlı Nakamura FIDE reytinqində üçüncü yeri tutur. O, beş dəfə ABŞ çempionu olub və 2022-ci ilin oktyabrında şahmatın alternativ versiyası olan Fişer şahmatı üzrə dünya çempionu adını qazanıb. Bu, onun e-idman klubu ilə ilk əməkdaşlığı deyil – daha əvvəl TSM və Misfits Gaming komandalarının bir hissəsi olub.
Esports World Cup 2025 və şahmat turniri
Bir çox kiberidman klubları Esports World Cup 2025 turnirinə hazırlaşaraq peşəkar şahmatçılarla müqavilə imzalayır. Bu tədbirin tərkibində şahmat turniri də yer alacaq və 1,5 milyon dollar mükafat fondu təqdim ediləcək.
Esports World Cup 2025 31 iyul – 3 avqust tarixlərində Səudiyyə Ərəbistanının paytaxtı Riyad şəhərində keçiriləcək.
