Team Vitality komandası BLAST Open Lisbon 2025 turnirinin böyük finalında MOUZ üzərində dramatik qələbə qazandı. Beş xəritədən ibarət qarşılaşma 3:2 hesabı ilə Vitality-nin xeyrinə başa çatdı: Inferno (13:0), Mirage (11:13), Dust2 (11:13), Nuke (13:7), Train (13:7).
Fransa təmsilçisi bu uğura görə 150 min dollar mükafat qazandı. Gümüş medalla kifayətlənən MOUZ isə 60 min dollarla turniri başa vurdu.
Turnirdə iştirak edən digər tanınmış komanda NAVI, təəssüf ki, yalnız 1/4 finala qədər irəliləyə bildi. Onlar spirit komandasına 0:2 hesabı ilə məğlub olaraq yarışdan kənarlaşdırıldılar. “Natus Vincere” 5-6-cı yerləri bölüşərək 20 min dollar mükafat əldə etdi.
19-30 mart tarixlərində keçirilən BLAST Open Lisbon 2025 turnirinin qrup mərhələsi Danimarkanın Kopenhagen şəhərindəki BLAST Studios-da, pley-off mərhələsi isə Portuqaliyanın Lissabon şəhərindəki MEO Arena-da baş tutdu. Turnirin ümumi mükafat fondu 400 min dollar təşkil edirdi.
