Martın 18-də “Tekken 8” üçün 3-cü mövsümün başlanğıcını qeyd edən və oyuna çoxsaylı balans dəyişiklikləri gətirən irimiqyaslı yenilənmə yayımlanıb. 2024-cü ildəki uğurlu relizdən sonra oyun mövsümi yenilənmələr, xüsusən də uğursuz alınan 2-ci mövsüm səbəbindən kəskin tənqidlərlə üzləşmişdi. Bu, “Bandai Namco”nu balans qrupunu tamamilə dəyişməyə və vəziyyəti kökündən düzəltməyə vadar etdi.
3-cü mövsüm hücum və müdafiə arasında daha proqnozlaşdırıla bilən balans təmin etməklə “köklərə qayıdış” kimi qələmə verilirdi. Səkkiz aylıq fasilədən sonra bu yenilənmə oyunun inkişafında yeni mərhələ olmalı idi. Artıq 3.00.00 versiyalı yenilənmə PC, PlayStation 5 və Xbox Series X/S platformalarında əlçatandır.
3-cü mövsüm yenilənməsi ilə gələn əsas dəyişikliklər:
- “Heat” sisteminin yenidən işlənməsi: Mexanikalar daha balanslı hala gətirilib;
- Reytinqli rejimin yenilənməsi: Mövsümi tərəqqi tamamilə sıfırlanıb;
- İkinci dərəcəli personajların izlənilməsi: Artıq əlavə döyüşçülərin tərəqqisini ayrıca izləmək mümkündür.
Tərtibatçıların sözlərinə görə, bu dəyişikliklər hər bir personajın fərdiliyini “neytral qarşılıqlı əlaqələr və psixoloji oyunlar zamanı daha aydın hiss etdirmək” üçün nəzərdə tutulub.
Yeni məzmunlar arasında “Round 9 Fight Pass” və oyunçuların rəylərini birbaşa çatdıra biləcəyi “Tekken Dev Feedback Portal” yer alıb. 2026-cı il ərzində oyuna Kunimitsu, Bob, Roger Jr. və hələlik adı açıqlanmayan daha bir döyüşçünün əlavə edilməsi planlaşdırılır.
İddialı dəyişikliklərə baxmayaraq, icmanın ilk reaksiyası əsasən mənfi olub. Sosial şəbəkələrdə bir çox oyunçu layihənin hazırkı vəziyyətini sərt tənqid edir. Məsələn, tanınmış kiberidmançı PhiDX bildirib ki, tərtibatçılar köklərə qayıtmaq əvəzinə “tamamilə fərqli istiqamətlərdə çoxlu pərakəndə addımlar atırlar”. Ümumilikdə oyunçular studiyanın vəd etdiyi ilə reallıq arasında böyük uçurum olduğunu düşünürlər.
Vəziyyəti çətinləşdirən digər mühüm məqam isə 2025-ci ilin sonunda layihənin uzunillik rəhbəri Katsuhiro Haradanın postunu tərk etməsidir. İndi hər kəsi bir sual düşündürür: Harada qalsaydı, oyunun gedişatını düzəldə bilərdimi? Bu fonda, 3-cü mövsüm uzunmüddətli gözləntiləri doğrultmaya bilər.
