Capcom xeyli müddətdir iddialı qorxu oyunu Resident Evil Requiem üçün yeni materiallar göstərmirdi. İndi güman olunur ki, növbəti treyler The Game Awards 2025 tədbirində nümayiş etdiriləcək. Hələlik isə fanatlar gözlənilən oyunun bir neçə saniyəlik təzə geympleyini görmək imkanı əldə ediblər.
Yaponiyanın bir televiziya şousunda Resident Evil Requiem-dən yeni kadrlar yayımlanıb və görüntülər dərhal internetdə viral olub. İnsayder Dusk Golem sayəsində bu fraqmentlər daha geniş auditoriya ilə də bölüşülüb.
Oyunçular hazırda layihənin texniki səviyyəsini fəal şəkildə müzakirə edirlər. Onlar xüsusilə animasiya keyfiyyətini və baş qəhrəman Qreys Eşkroftun hərəkətlərinin detallı işlənməsini vurğulayırlar. Gamerlərin sözlərinə görə, personaj qaçarkən büdrəyir, ehtiyatla addımlayır, əşyaları tuta-tuta tarazlığını saxlamağa çalışır və dəhşətli monstrdan qaçış zamanı hər hərəkəti çox təbii görünür.
Reliz yalnız fevralın sonuna planlaşdırılsa da, Resident Evil pərəstişkarları artıq iddia edirlər ki, Requiem təkcə seriyanın layiqli davamı deyil, həm də bu ənənəvi olaraq yüksək standartlı franşizadakı ən güclü oyunlardan biri ola bilər.
Resident Evil Requiem 27 fevral 2026-cı ildə PC, PlayStation 5, Xbox Series və Nintendo Switch 2 platformalarında işıq üzü görəcək.
