EA Sports FC intizamının 2026-cı ilin noyabrında Səudiyyə Ərəbistanının Ər-Riyad şəhərində keçiriləcək ilk Esports Nations Cup turnirinin rəsmi proqramına daxil edildiyi təsdiqlənib. Yarışın ümumi mükafat fondu 600 min dollar təşkil edəcək.
Turnirdə iştirak edəcək 128 oyunçunun seçilməsi üçün bir neçə üsul nəzərdə tutulub:
- 64 iştirakçı birbaşa dəvət alacaq.
- 56 oyunçu regional seçmə mərhələlərdən keçərək vəsiqə qazanacaq.
- 8 oyunçu isə xüsusi “wildcard” vasitəsilə turnirə qatılacaq.
Birbaşa dəvətlər EA SPORTS FC Pro World Rankings siyahısına əsasən veriləcək, lakin geniş coğrafi təmsilçilik üçün hər ölkədən yalnız bir oyunçunun seçilməsinə icazə veriləcək. Reytinq üzrə son qərar 26 iyul tarixində veriləcək. Regional təsnifatlar isə 27 iyul – 2 avqust tarixlərində Afrika, Asiya, Avropa, Latın Amerikası, Şimali Amerika, Okeaniya və Yaxın Şərq daxil olmaqla müxtəlif bölgələrdə keçiriləcək.
Yarışın formatı iki mərhələdən ibarət olacaq:
- Başlanğıcda 128 oyunçu hər birində səkkiz nəfər olmaqla 16 qrupa bölünəcək və “round-robin” sistemi üzrə iki qələbəyə qədər (best-of-two) oyunlar keçirəcək.
- Qrup mərhələsindən sonra 64 ən yaxşı oyunçu birbaşa çıxılma sistemi ilə keçirilən pley-off mərhələsinə yüksələcək.
