“Capcom” şirkəti “Resident Evil Requiem” oyununun növbəti böyük zəfərini elan edib. Relizdən cəmi 16 gün keçməsinə baxmayaraq, oyunun satışı artıq 6 milyon nüsxəni keçib.
Kult zombi seriyasının doqquzuncu əsas hissəsi franşizanın ən sürətlə satılan layihəsinə çevrilib. Bu sahədə əvvəlki rekord, həm oyunçular, həm də tənqidçilər tərəfindən rəğbətlə qarşılanan “Resident Evil 4” remeykinə məxsus idi.
Bu uğurun səbəbi yalnız oyunun çoxsaylı platformalarda təmsil olunması və texniki cəhətdən qüsursuzluğu deyil. Eyni zamanda iki fərqli geympley (gameplay) üslubunun sintezi geniş auditoriyanın marağına səbəb olub:
- Leon Kennedi (Leon Kennedy): Onun iştirak etdiyi süjet epizodları dinamik döyüşlərə (action) köklənib və üslubca “Resident Evil 4”-ü xatırladır.
- Analitik Qreys (Grace): FTB analitiki Qreysin hekayəsi isə “Resident Evil 7” ənənələrinə sadiq qalaraq klassik “survival horror” (sağ qalma qorxusu) üslubundadır. Qreys silahlara qarşı məsafəlidir, fiziki cəhətdən tez yorulur və birbaşa hücumlara qarşı dözümsüzdür. Buna görə də o, əsasən gizli hərəkət etməyə üstünlük verir, lakin çıxılmaz vəziyyətlərdə rəqibə cavab qaytarmaq qabiliyyətinə malikdir.
Pərəstişkarlar üçün sürprizlər və gələcək planlar
Oyun köhnə pərəstişkarlar üçün çoxsaylı “fan-servis” və keçmişə aid istinadlarla zəngindir. İllərdir davam edən bəzi süjet xətləri bu hissədə məntiqi sonluğa çatsa da, oyunçular üçün yeni müəmmalar da yaradılıb.
“Capcom” artıq irimiqyaslı süjetli əlavənin (DLC) hazırlanmasını rəsmən təsdiqləyib. Bundan əlavə, may ayında təqdim olunacaq pulsuz yenilənmə ilə oyuna foto rejimi və xüsusi kart mini-oyunu əlavə ediləcək.
