Gözlənilən döyüş rol oyunu (Action-RPG) “Phantom Blade Zero” rəsmi çıxışından sonrakı ilk 72 saat ərzində 4 milyondan çox nüsxə satılıb. Bu barədə layihənin tərtibatçısı olan “S-Game” studiyası rəsmi bəyanat yayıb.
PC və PS5-də böyük uğur: “Steam”də 700 mindən çox onlayn istifadəçi
Açıqlanan satış rəqəmləri oyunun təmsil olunduğu hər iki platformanı — fərdi kompüter (PC) və “PlayStation 5” konsolunu əhatə edir. 29 oktyabr tarixində qlobal relizi baş tutan layihə “S-Game” komandasının mobil oyun sənayesindən kənarda ilk irimiqyaslı və böyük büdcəli işi kimi qeydə alınıb.
Oyun “Steam” rəqəmsal platformasında da böyük ajiotaja səbəb olub. Çıxışın ilk günündə eyni vaxtda oyunda olan istifadəçilərin pik sayı (peak online) 700 min nəfəri keçib.
66 günlük intiqam və sui-qəsd hekayəsi
“Phantom Blade Zero” sürətli döyüş mexanikası və qaranlıq Şərq mifologiyası elementləri ilə zəngin olan dinamik döyüş rol oyunudur. Süjet xəttinə əsasən, baş qəhrəman Soul öz müəllimini qətlə yetirməkdə haqsız yerə ittiham olunur. Ölümcül dərəcədə yaralanan və yaşamaq üçün cəmi 66 günü qalan qəhrəman adını təmizə çıxarmaq və ona qurulan genişmiqyaslı sui-qəsdi faş etmək üçün təhlükəli yola çıxır.
