IEM Rio 2026 turnirinin ilk günü başa çatdı və hər iki qrupda kiberidman həvəskarlarının müzakirə edəcəyi xeyli maraqlı nəticələr qeydə alındı. A qrupunda Vitality, G2, Spirit və Falcons, B qrupunda isə FURIA, NAVI, MOUZ və Aurora yollarına davam edirlər.
A qrupu: “Falcons”un qayıdışı və G2-nin çətin qələbəsi
Günün ən səs-küylü hadisəsi “Inferno” xəritəsində baş verdi. 3DMAX komandası Falcons qarşısında ilk hissədə 9:1 hesabı ilə öndə olsa da, bu böyük üstünlüyü qoruya bilmədi. “Falcons” inanılmaz geri dönüş edərək xəritəni 13:10, seriyanı isə 2-0 hesabı ilə xeyrinə başa vurdu və rəqibini birbaşa aşağı səbətə (lower bracket) göndərdi.
Digər tərəfdən, G2 komandası Gentle Mates ilə matçda gözləniləndən daha çox çətinlik çəkdi. Autsayderlər NertZ-in başçılıq etdiyi kollektivdən bir xəritə almağı bacarsalar da, həlledici “Overpass” xəritəsində tAk öz oyunu ilə parlayaraq G2-nin məğlubiyyətdən qaçmasına kömək etdi. Vitality mərhələni rahat keçdiyi halda, Liquid komandası Spirit-ə məğlub olaraq aşağı səbətə yuvarlandı.
B qrupu: NAVI-dən “quru” qələbə, “Legacy” MOUZ-u tərlətdi
NAVI B qrupundakı mübarizəsinə rəqiblərinə göz dağı verməklə başladı. Onların B8 ilə “Ancient” xəritəsindəki qarşılaşması 13:0 hesabı ilə NAVI-nin xeyrinə bitdi. Bu “quru” qələbə bütün sessiyanın tempini müəyyən etdi. MOUZ da növbəti mərhələyə yüksəldi, lakin Legacy onlardan bir xəritə qazanaraq çempionluq yolunda onlara asan gəzməyə imkan vermədi. FURIA isə Passion UA ilə qarşılaşmadan qalib ayrılaraq NAVI ilə birlikdə irəlilədi. Aurora da günü 2-0 hesabı ilə tamamladığı halda, HOTU hələ də aşağı səbətdə sağ qalmaq uğrunda mübarizə aparır.
Növbəti oyunlar
Çərşənbə axşamı yuxarı səbətin yarımfinalları baş tutacaq:
- Vitality vs G2
- Spirit vs Falcons
- FURIA vs NAVI
Paralel olaraq aşağı səbətdə “sağ qalma” matçları keçiriləcək: RED Canids vs Gentle Mates və Liquid vs 3DMAX. Çərşənbə günü hər iki qrupda finallar oynanılacaq və həftəsonu keçiriləcək pley-off mərhələsinin iştirakçıları tam bəlli olacaq.
