“PGL” turnir operatoru kiberidman təqviminin mühüm yarışlarından biri olacaq PGL Cluj-Napoca 2027-ni rəsmən anons etdi. 11-21 fevral 2027-ci il tarixlərində baş tutacaq bu turnir həm formatı, həm də komandalar üçün nəzərdə tutulan maliyyə stimulları ilə diqqət çəkir.
Mükafat fondu və motivasiya paketi
Turnirin ümumi mükafat fondu 1.3 milyon dollar təşkil edəcək. Lakin təşkilatçılar ən güclü klubların marağını cəlb etmək üçün əlavə bir addım atıblar: VRS (Valve Ranking System) reytinqində ilk 5 pillədə qərarlaşan və dəvəti qəbul edən komandalar üçün əlavə 300 000 dollar məbləğində bonus fondu ayrılıb. Bu xüsusi ödənişin məqsədi top-səviyyəli komandaların eyni dövrə təsadüf edən digər yarışlara deyil, məhz PGL turnirinə üstünlük verməsini təmin etməkdir.
İştirakçılar və seçmə formatı
Yarışda cəmi 16 komanda mübarizə aparacaq. Bu dəfə təşkilatçılar seçim qaydasında müəyyən yeniliklər ediblər:
- 14 komanda birbaşa VRS reytinqi əsasında dəvət alacaq;
- 2 komanda isə qapalı Avropa seçmə mərhələləri vasitəsilə turnirə vəsiqə qazanacaq.
Bu yanaşma əvvəlki “Cluj” turnirlərindən fərqlənir, çünki əvvəllər bütün iştirakçılar istisnasız olaraq yalnız reytinq əsasında müəyyənləşirdi.
Keçmişə nəzər
Xatırladaq ki, 2026-cı ildə keçirilən PGL Cluj-Napoca turnirində də 16 komanda iştirak etmişdi. Həmin yarışın finalında PARIVISION kollektivini məğlub edən Team Vitality çempion olmuş və 225 000 dollar pul mükafatı qazanmışdı.
