“Starfield” ötən həftə ABŞ-da ən çox satılan oyunlar siyahısında yenidən birinci pilləyə yüksəlib. Belə bir hal sonuncu dəfə oyunun 2023-cü ildəki rəsmi buraxılışı zamanı yaşanmışdı.
Bu artımın əsas hərəkətverici qüvvəsi “PlayStation 5” versiyası olub. Satışların böyük hissəsi məhz bu platformanın payına düşüb. Hesablamalara görə, “Sony”-nin konsolunda ilk həftə ərzində təxminən 140 000 nüsxə satılıb. Eyni zamanda, digər platformalarda da oyuna maraq artıb.
Videooyun bazarı üzrə analitik Met Piskatella qeyd edib ki, bu, “Starfield”-in 2 sentyabr 2023-cü il həftəsindən (oyun o zaman PC və Xbox-da çıxmışdı) bəri ilk dəfə ABŞ-da həftəlik satış çartına başçılıq etməsidir.
“PlayStation 5” versiyası buraxılışdan sonrakı illər ərzində çıxan çoxsaylı yenilənmələr, xüsusən də “Free Lanes” və “Terran Armada” sayəsində üstünlük qazanıb. Bununla belə, yeni platformada start problemsiz keçməyib: oyunçular bəzi hallarda oyunu keçilməz edən baqlar və texniki xətalardan şikayət ediblər, hətta bəziləri ödənişin geri qaytarılmasını tələb ediblər. “Bethesda” bu şikayətlərdən sonra bir neçə təcili düzəliş (hotfix) yayımlayıb.
Çartlarda birinci yerə baxmayaraq, ekspertlər bu uğuru şişirtməməyi məsləhət görürlər. “PlayStation 5”-də buraxılış həftəsində “Starfield”-in ciddi rəqibi demək olar ki, olmayıb. “Alinea Analytics”-in analitiki Ris Elliott 140 000-lik satışı “mötədil” adlandırıb və qeyd edib ki, bu rəqəm “Steam”-dəki 3,7 milyon və “Xbox”-dakı 1 milyon nüsxə fonunda (hətta “Game Pass”-ın təsirini nəzərə alsaq belə) kifayət qədər təvazökar görünür. Elliott yazır:
“Bethesda-nın büdcəsi və on illik inkişaf dövrü kontekstində ‘Starfield’ çox güman ki, xərclərini çətinliklə ödəyib”.
Oyunun gələcəyi hələ rəsmən təsdiqlənməyən, lakin artıq Tayvanın yaş reytinqi saytında görünən “Switch 2” buraxılışı sayəsində daha da canlana bilər. Belə sızıntılar adətən yaxınlaşan rəsmi anonsun xəbərçisidir.
“Bethesda” daha əvvəl “Starfield”-i illərlə dəstəkləməyi planlaşdırdığını və oyunun inkişafı üçün uzunmüddətli strategiyalarının olduğunu bildirmişdi. Əlavə platformalardakı yeni çıxışlar bu marağı qoruya bilər, lakin bu trendin nə qədər davam edəcəyi sual altındadır.
