ABŞ-nin əyləncə paytaxtı sayılan Las-Veqas şəhəri 2028-ci ildə “Counter-Strike 2” üzrə ilin ikinci “Major” turnirinə ev sahibliyi etməyə hazırlaşır. Bu barədə “Esports Radar” portalı Las-Veqas Konvensiya və Ziyarətçilər İdarəsinin (Las Vegas Convention and Visitors Authority — LVCVA) rəsmi sənədlərinə istinadən məlumat yayıb.
Məlumata görə, şəhər idarəsi beynəlxalq turnir operatoru “BLAST” ilə şəhərdə iki böyük kiberidman tədbirinin təşkilini nəzərdə tutan 2 milyon ABŞ dolları dəyərində sponsorluq müqaviləsini təsdiqləməyi planlaşdırır.
Bu iki yarışdan birinin məhz 2028-ci ilin payız “CS2 Major”u olacağı gözlənilir. İlkin plana əsasən, mötəbər çempionat ABŞ-də qeyd olunan Şükranlıq günü (Thanksgiving) ilə “National Finals Rodeo” tədbiri arasındakı dövrdə keçiriləcək. Nüfuzlu “HLTV” portalı həmin ilin ikinci “Major” turniri üçün təxmini təqvimin 20 noyabr – 10 dekabr 2028-ci il tarixlərini əhatə etdiyini diqqətə çatdırır.
Yay turniri və turizmə 130 minlik töhfə
Saziş çərçivəsində nəzərdə tutulan ikinci turnir isə 2028-ci ilin yayında nəhəng “Las Vegas Convention Center” arenasının ev sahibliyi ilə baş tutacaq. Hələlik bu yay çempionatında hansı kiberidman fənninin yer alacağı açıqlanmayıb.
LVCVA-nın hesablamalarına görə, bu iki beynəlxalq tədbir şəhərdəki otellərdə ümumilikdə təxminən 130 min gecələmə (otaq sifarişi) yaradaraq yerli turizm sektoruna ciddi iqtisadi fayda gətirəcək. Müqayisə üçün qeyd edilir ki, “BLAST.tv Austin Major 2025” turnirinə 45 mindən çox bilet satılmış və qonaqların təxminən 80%-i birbaşa Texas ştatından kənardan gəlmişdi.
Sponsorluq razılaşması ilə bağlı yekun rəsmi qərarın 10 noyabr tarixində keçiriləcək iclasda baxılaraq təsdiqlənməsi gözlənilir.
