Valve şirkəti BLAST Austin Major 2025 turniri üçün taktiki şuter Counter-Strike 2-nin yarış xəritələr dəstində (map-pool) dəyişikliklər etdiyini elan edib.
Train Xəritəsi Yenidən Yarışlara Qayıdır
Train xəritəsi rəsmi map-pool-a geri dönür və CS2-nin beta-testindən bəri istifadə olunan Vertigo xəritəsini əvəzləyəcək. Şayiələr təsdiqini tapdı – inkişaf etdiricilər komandaların və kiberidmançıların rəylərini nəzərə alıb. Xüsusilə, NaVi və Team Liquid kimi bəzi komandalar Vertigo xəritəsini qəsdən seçmirdi.
RMR Yerinə MRQ Formatı
2025-ci ildən etibarən RMR turnirlərinin formatı tamamilə ləğv edilib. Onun yerinə Major üçün yeni seçmə mərhələlər – Major Regional Qualifiers (MRQ) keçiriləcək. Burada:
- Şimali və Cənubi Amerikadan 16 komanda,
- Avropadan 16 komanda,
- Asiyadan 8 komanda iştirak edəcək.
BLAST Austin Major 2025 Turniri Haqqında
- Turnir tarixləri: 9-22 iyun 2025
- Keçiriləcəyi yer: Ostin, ABŞ
- Ümumi mükafat fondu: 1,25 milyon dollar
- Qalibin mükafatı: 500 min dollar, kubok və çempion titulu.
Valve-in Dünya Reytinqi
Valve 2022-ci ilin sonunda Counter-Strike üzrə öz dünya reytinqini təqdim edib. 2025-ci il turnir və major seçmələri bu reytinq əsasında da aparılır. Hazırda ilk 20-likdə olan komandaların hər biri ən azı 1350 xal toplayıb.
Train Xəritəsinin Tarixi
Train xəritəsi yarış xəritələr dəstindən 2021-ci ildə çıxarılmışdı. Bu xəritə CS:GO-nun son gününə qədər oyunda qalsa da, CS2-yə əlavə edilməmişdi. Lakin xəritə CS2-nin treylerlərində nümayiş olunaraq geri dönüşə işarə edirdi. Train, nəhayət, 2024-cü il noyabrın 14-də CS2-yə əlavə olundu. Sonuncu dəfə major seriyasında bu xəritə StarLadder Berlin Major 2019-da istifadə edilib.
