İki həftə əvvəl Valve Steam Machine adlı yeni qurğunu — oyun konsolu ilə kompakt kompüterin hibridini — təqdim etdi. Lakin şirkət dəqiq qiymət deməyərək yalnız onu bildirdi ki, cihazın dəyəri “oxşar xüsusiyyətli orta səviyyəli PC” səviyyəsində olacaq.
Məşhur Linus Tech Tips kanalı Steam Machine üçün açıqlanan texniki göstəricilərə uyğun kompüter yığaraq, qurğunun təxmini qiymətini hesablamağa çalışıb.
Valve-in məlumatına görə, sistem aşağıdakı konfiqurasiyanı alacaq:
- altı nüvəli AMD Zen 4 prosessoru, tezliyi 4,8 GHz-ə qədər;
- 28 hesablama bloklu AMD RDNA3 qrafikası;
- 16 GB DDR5 operativ yaddaş və 8 GB GDDR6 VRAM.
Linus Tech Tips komandasının hesablamalarına görə, bu səviyyədə konfiqurasiyaya malik kompüterin orta qiyməti təxminən 700 ABŞ dolları təşkil edir.
Onların fikrincə, Steam Machine üçün də oxşar qiymət gözləmək olar:
“Valve konsolu bundan xeyli baha sata bilməz, amma eyni zamanda ucuz satmaq da iqtisadi cəhətdən sərfəli olmaz”, — deyə müəlliflər qeyd edirlər.
Ekspertlər əlavə edirlər ki, istehsal miqyası artdıqca cihaz bir qədər ucuzlaşa bilər, lakin qlobal bazarda operativ yaddaş çatışmazlığı səbəbindən əks tendensiya — qiymətlərin artması da mümkündür.
Rəsmi qiymət hələ elan olunmadığından, bütün bu hesablamalar hələlik yalnız əsaslandırılmış ehtimallar kimi qalır.
