Məşhur insayder Jez Corden-in verdiyi məlumata görə, Microsoft 2026-cı ildə üç əsas eksklüziv oyun buraxmağa hazırlaşır. Bunlar Fable, State of Decay 3 və Gears of War: E-Day olacaq.

Windows Central-ın insayderi bildirib ki, State of Decay 3-ün ilk yarımildə çıxması planlaşdırılır və onun üzərində Undead Labs studiyası işləyir.

Microsoft daha əvvəl Fable oyununun 2026-cı ilə təxirə salındığını təsdiqləmişdi. Forza Horizon-un arxasında duran Playground Games studiyası tərəfindən hazırlanmış oyun açıq dünya RPG-sı olacaq və özünəməxsus Britaniya yumoru ilə seçiləcək.

Digər böyük buraxılış Gears of War: E-Day olacaq. Bu oyun, klassik trilogiyadan əvvəlki hadisələri əks etdirən süjet xronologiyasının başlanğıcını göstərəcək. Oyunun 2025-ci ilin sonlarında çıxması ehtimal olunur, lakin əsas tarix 2026-cı il kimi nəzərdə tutulur.

Bu üç oyun Xbox-un gələcək planlarının yalnız bir hissəsidir. Digər böyük layihələr barədə məlumatlar isə hələlik gizli saxlanılır.

Yeni Xbox konsolu nə zaman gəlir?

Jez Corden-ə görə, yeni Xbox konsolu 2027-ci ildən tez buraxılmayacaq və ənənəvi konsollardan daha çox PC-yə bənzəyəcək.

“İddia edirlər ki, studiyalar artıq yeni Xbox-un inkişaf dəstlərini alıblar. Bu, həqiqətə uyğun deyil” – deyə Xbox Two podkastında bildirib.

Onun sözlərinə görə, Microsoft-un yeni nəsil konsolu “PC-yə bənzəyəcək, lakin televizor üçün optimallaşdırılmış interfeysə sahib olacaq”. Bu yanaşma inkişaf studiyalarının xüsusi devkitlər olmadan sadəcə müəyyən texniki göstəricilərə uyğun oyunlar hazırlamasına imkan verəcək.

Corden əmindir ki, yeni Xbox-un 2027-ci ildən tez təqdim olunması real deyil.

Naughty Dog studiyasının rəhbəri Neil Drakmann son müsahibəsində The Last of Us 3 oyununu hələlik qəti layihə kimi görmədiklərini açıqlayıb. O, ikinci hissənin açıq sonluğuna və əvvəlki fikirlərinə baxmayaraq, fanatların böyük ümidlər bəsləməməli olduğunu bildirib.

Variety jurnalına verdiyi müsahibədə, HBO-nun The Last of Us serialının ikinci mövsümü müzakirə olunarkən Drakmanna üçüncü hissə barədə sual verilib.

“Bu sualı gözləyirdim. Deyə biləcəyim yeganə şey budur: The Last of Us-un davamına çox da bel bağlamayın. Bu, son ola bilər” – Drakmann belə cavab verib.

Qarışıq siqnallar və studiyanın yeni istiqaməti

Bu açıqlama onun 2023-cü ilin fevralında The Last of Us Part II-nin hazırlanması ilə bağlı çəkilmiş sənədli filmdə dedikləri ilə ziddiyyət təşkil edir. Həmin vaxt üçüncü hissə üçün maraqlı bir ideya tapdığını və bu konsepsiyanın ilk iki oyun qədər təsirli olduğunu bildirmişdi.

Lakin Naughty Dog bu arada PS5 üçün yeni layihəsi olan Intergalactic: The Heretic Prophet oyununu elan edib. Studiyanın The Last of Us-un çoxnəfərlik rejimini ləğv etməsi də onların fərqli istiqamət götürdüyünü təsdiqləyir. Şirkət hazırda bir neçə yeni ambisiyalı təkoyunçu layihələri üzərində işlədiyini bildirib.

Polşanın The Farm 51 studiyası Chernobylite 2: Exclusion Zone oyununu erkən girişə açıb. Açıq dünya RPG janrında olan bu oyunda oyunçular sağ qalmalı, resurslar toplamalı və personajlarını inkişaf etdirməlidirlər.

İkinci hissə, ilk versiyaya nisbətən 20 dəfə böyük xəritəyə və yeni tapşırıqlara, təsadüfi hadisələrə və fəaliyyətlərə sahibdir.

Erkən giriş versiyasında nələr var?

• Oyun tam versiyanın 30-40%-ni əhatə edir
• Əksər silahlar və avadanlıqlar artıq mövcuddur
• Cari versiyanı tamamlamaq üçün təxminən 30 saat tələb olunur
• Oyunçular birinci və üçüncü şəxs baxışı arasında keçid edə bilərlər
• Tam versiya 6-10 ay ərzində rəy əsasında təkmilləşdiriləcək

İlk reaksiyalar və tənqidlər

Oyunun pulsuz demo versiyası əvvəlcədən yayımlansa da, fanatlar arasında böyük həyəcan yaratmadı.

• Reallıq hissini tamamilə itirdiyi iddia olunur
• Süjetin paralel dünyalar üzərində qurulması “ucuz fantastika” kimi qiymətləndirilir
• Döyüş sistemi MMO janrına bənzədilib: canavarların sağlamlıq zolaqları və yaxın döyüşdə qılınc istifadəsi atmosferi zəiflədir
• Grafik keyfiyyətin ilk hissəyə nisbətən aşağı olduğu, lakin sistem tələblərinin daha yüksək olduğu bildirilir