Asiyanın ən böyük oyun sərgisi Tokyo Game Show 2025 start götürməyə hazırlaşır. Tədbirin əsas iştirakçılarından biri isə Microsoft olacaq. Şirkət 27 sentyabr tarixində böyük stend və geniş təqdimat planlaşdırır.

Xbox brendi TGS-i öz layihələrini tanıtmaq üçün strateji platforma kimi görür. Ən diqqətçəkən məqam isə yeni oyunu şəxsən Microsoft Gaming rəhbəri Fil Spenserin təqdim edəcək olmasıdır.

Hansı oyun təqdim edilə bilər?

Hazırda dəqiq hansı layihənin təqdim olunacağı açıqlanmayıb. Lakin əsas ehtimallardan biri — Yaponiya üslubunda hazırlanan Forza Horizon 6-dır. Bununla yanaşı, Microsoft son vaxtlar yapon studiyaları ilə əməkdaşlığı genişləndirir, bu isə ortaq layihənin anons ediləcəyi ehtimalını gücləndirir. Şirkətin eyni anda bir neçə yeni oyunu da təqdim etməsi mümkündür.

Tədbirin vaxtı

Tokyo Game Show 2025 sərgisi 25–28 sentyabr tarixlərində keçiriləcək. Microsoft-un təqdimatı isə 27 sentyabr, saat 12:00-da (CEST) başlayacaq.

Team Vitality futbol klubu “Paris Saint-Germain”-in (PSG) kiberidman bölməsi ilə uzunmüddətli tərəfdaşlığa imza atdı. Bu əməkdaşlıq EA Sports FC Pro 2025/26 mövsümündən etibarən qüvvəyə minəcək.

PSG.Vitality – yeni ad altında çıxış

Müqaviləyə əsasən, Team Vitality-nin EA Sports FC bölməsi bundan sonra PSG.Vitality adı ilə çıxış edəcək. Komandanın hazırkı üzvləri İlian Buçi və Bris Masson heyətdə qalaraq yeni teq altında mübarizə aparacaqlar.

Paris klubu bu tərəfdaşlığı kiberidman sənayesində iştirakını genişləndirmək istiqamətində növbəti mühüm addım kimi dəyərləndirib.

Oyun və kiberidman festivalı DreamHack tarixində ilk dəfə Böyük Britaniyada baş tutacaq. İctimaiyyətə məlumatı təşkilatçı ESL FACEIT Group sosial şəbəkələrdə açıqlayıb.

Festival 2026-cı il 27–29 mart tarixlərində Birmingem şəhərində yerləşən NEC arenasında keçiriləcək. Tədbir çərçivəsində ən böyük diqqəti ESL One Birmingham 2026 Dota 2 turniri cəlb edəcək. Bu, şəhərdə dördüncü dəfə keçiriləcək Dota 2 üzrə major tədbir olacaq.

Tarixi arxa plan

Əslində, DreamHack daha əvvəl də Birləşmiş Krallıqda oyunsevərlərlə görüşüb. 2015-ci ildə burada DreamHack Open seriyası keçirilmişdi. Həmin yarışlarda Ultra Street Fighter IV, CS:GO, Call of Duty: Advanced Warfare və Super Smash Bros. Melee üzrə turnirlər təşkil olunmuşdu.

2024-cü ildə baş tutan ESL One Birmingham turniri isə 145 000 funt sterlinq maliyyə dəstəyi almışdı. Yardımı West Midlands Combined Authority (WMCA) və Böyük Britaniya hökuməti təmin etmişdi. Hazırda təşkilatçılar 2026-cı il üçün oxşar maliyyə razılaşmasının olub-olmadığını açıqlamayıb.

Amerikalı reper Amala Ratna Zandile Dlamini, yəni Doja Cat, məşhur Fortnite oyununda görünəcək. O, bu barədə son yayımında özü açıqlama verib.

“Yaxın gələcəkdə çox maraqlı şeylər baş verəcək. Mən həyəcanlıyam, çünki oyunlardan danışsaq, mən Fortnite-də olacağam. Mən o azsaylı insanlardan biriyəm ki, öz skinim olacaq və özüm də onu oynayacağam”, – deyə Doja Cat bildirib.

Insider məlumatı

Məşhur Fortnite insayderi HYPEX qeyd edib ki, reperin skini Icon seriyasına daxil ediləcək və “çox tezliklə” oyunçular üçün əlçatan olacaq.

Hazırda Doja Cat-in skininin rəsmi çıxış tarixi açıqlanmayıb. Lakin nəzərə alsaq ki, Icon seriyasından Kai Cenat-ın skini yaxınlarda təqdim olunub, pərəstişkarların bu əməkdaşlıqla bağlı xəbərləri bir qədər gözləməsi lazım ola bilər.