Fransız insayder KRL “MOUZ” klubunun danimarkalı ulduz Emili “Magisk” Reyf ilə maraqlandığına dair məlumat paylaşıb. Mənbənin bildirdiyinə görə, təşkilat heyətini “Counter-Strike”ın yüksək səviyyəli turnirlərində böyük təcrübəyə malik olan peşəkar bir oyunçu ilə gücləndirməyi planlaşdırır.
“Magisk” kiberidman səhnəsinin ən çox titul qazanan oyunçularından biridir. Lakin bu məlumat hələlik yalnız şayiə xarakteri daşıyır; nə “MOUZ” klubundan, nə də oyunçunun özündən hər hansı rəsmi açıqlama gəlməyib. Buna görə də, təşkilatın gələcək qərarlarından və mövcud heyətin vəziyyətindən asılı olaraq şərait dəyişə bilər.
Danimarkalı oyunçunun hazırda komandada kimi əvəz edəcəyi məlum deyil. Hazırda heç bir kluba bağlı olmayan “Magisk” indi heyətə qoşulsa belə, qaydalara əsasən oyunçu etiketi (sticker) əldə edə bilməyəcək. Bu səbəbdən transferin IEM Cologne Major 2026 turnirinin başa çatmasından sonra rəsmiləşəcəyi ehtimalı daha yüksəkdir.
