İnsayderlərin — jurnalist Arra və “Inven Global” nəşrinin məlumatına görə, cənubi koreyalı mütəxəssis Kim “Roach” Kan-xvi 2027-ci il LCK mövsümündə “T1″in “League of Legends” heyətinə rəhbərlik edəcək. 27 yaşlı çalışdırıcı 2024-cü ilin noyabrında məcburi hərbi xidmətə yollanması səbəbindən tərk etdiyi təşkilata xidmətini başa vurduqdan sonra geri dönür.
“Roach” üçün bu, 2020–2024-cü illərdə çalışdığı və yaxşı tanıdığı struktura qayıdış deməkdir. Oyunçu karyerasına 2016-cı ildə “Kongdoo Monster”də başlayan mütəxəssis 2019-cu ildə “Gen.G”yə keçib, 2020-ci ildə isə yuxarı cinah oyunçusu (topleyner) kimi “T1″ə qoşulub. 2020–2021-ci illərdə əsas və akademiya heyətlərində çıxış etdikdən sonra o, məşqçilik fəaliyyətinə keçid edib. 2022-ci ildə klubun akademiyası ilə çalışan “Roach”, 2023-cü ilin yayında əsas komandanın məşqçilər korpusuna daxil olub və kollektivə ardıcıl iki dünya çempionluğu (“Worlds 2023” və “Worlds 2024”), eləcə də “Esports World Cup 2024” kubokunu qazanmaqda kömək edib.
2026-cı ilin uğursuzluğu və 2027-ci il üçün heyət planları
Kadr dəyişiklikləri “T1” üçün 2026-cı il mövsümünün uğursuz başa çatması fonunda baş verir. Komanda “Worlds 2026″nın yarımfinalında Çinin “Bilibili Gaming” kollektivinə 1:3 hesabı ilə uduzaraq finalın bir addımlığında mübarizəni dayandırıb və bununla da Koreya klubunun dünya arenasındakı üçillik dominantlığına son qoyulub. 2026-cı il ərzində “T1″in məşqçilər korpusunda mütəmadi rotasiyalar aparılıb: Kim “kkOma” Çon-qün fasilə götürdükdən sonra baş məşqçi səlahiyyətlərini “Mata” və “Easyhoon”un dəstəyi ilə İm “Tom” Ce-hyon icra edib.
Hazırda təşkilat tərəfindən rəsmi təsdiq gözlənilir və 2027-ci il üçün heyətin formalaşdırılması prosesi davam edir. Gələcək baş məşqçidən başqa, “T1″in 2027-ci il mövsümü üçün təsdiqlənmiş yeganə oyunçusu hələlik midleyner Li “Faker” San-hyok olaraq qalır.