“Epic Games” tərtibatçı şirkəti Fortnite oyununun rəsmi olaraq “App Store” vasitəsilə “iPhone” və “iPad” cihazlarına geri qayıtdığını elan edib. Xatırladaq ki, oyun hələ 2020-ci ilin avqust ayında “Epic Games”in “Google” və “Apple” qaydalarını pozan şəxsi oyun daxili ödəniş sistemini tətbiq etməsindən sonra “Play Store” və “App Store”dan silinmişdi.
“Epic Games”in baş icraçı direktoru (CEO) Tim Suini öz rəsmi “X” sosial şəbəkə hesabında məsələni belə şərh edib:
“Epic və Apple arasındakı məhkəmədə final döyüşünə yaxınlaşdıqca, Fortnite yenidən Apple App Store-a geri dönür. İllərdir ki, Apple gizli tənzimləyici danışıqlar apararaq və ədaləti qəsdən gecikdirərək iOS funksiyalarını və sistem yığımlarını ərazilər üzrə parçalayıb”.
Qlobal miqyasda reallaşan bu mühüm geri dönüşə baxmayaraq, Avstraliya hələ də ödəniş şərtlərinin tam həll olunmaması səbəbindən oyunun iOS platformasında əlçatmaz qaldığı azsaylı regionlardan biri olaraq qalmaqdadır.
