Riot Games elan edib ki, League of Legends üzrə birləşdirilmiş Amerika liqası LTA 2026-cı ildən etibarən fəaliyyətini dayandırır. Bu barədə açıqlama LTA 2025 Championship-in qrand-finalı zamanı verilib.
LCS və CBLOL-un geri dönüşü
Gələn ildən etibarən yenidən Şimali və Cənubi Amerika üçün ayrı liqalar – LCS və CBLOL fəaliyyət göstərəcək. Riot bildirib ki, bu addım əsasən fanatların daimi narazılıqları ilə bağlıdır: onlar regional kimliyin itirilməsindən və liqanın qarışıq formatından məyus idilər.
Niyə LTA alınmadı?
LTA 2025-ci ildə yaradılmışdı və məqsəd Şimali və Cənubi Amerikanı vahid rəqabət strukturu altında birləşdirmək idi. Riot bu modelin oyun səviyyəsini artıracağını və daha çox maraqlı qarşılaşmalar təqdim edəcəyini düşünürdü. Lakin fanatlar dəyişiklikdən razı qalmadılar və ənənəvi regional liqalara üstünlük verdiklərini dəfələrlə vurğuladılar.
Son çempionat
LTA tarixində sonuncu titulun sahibi FlyQuest oldu. Komanda finalda Keyd Stars-ı 3:1 hesabı ilə məğlub edərək LTA 2025 Championship-in qalibi adını qazandı.
