Cənubi Koreyanın Seul şəhərində yerləşən “L’Escape” oteli “Blizzard Entertainment” ilə eksklüziv əməkdaşlığa başladığını elan edib. Bu layihə “World of Warcraft” (WoW) oyununun maraqla gözlənilən “Midnight” əlavəsinin çıxışına həsr olunub.
Əməkdaşlıq çərçivəsində otelin lüks nömrələrindən biri tamamilə “World of Warcraft” dünyasının estetikasına uyğun dizayn edilib. Otaq yüksək performanslı oyun kompüteri ilə təchiz olunub ki, bu da qonaqlara istirahət zamanı birbaşa “WoW: Midnight” dünyasına daxil olmaq imkanı yaradır.
Tematik paketi sifariş edən hər bir müştəriyə “L’Escape” və “Blizzard” dizaynerləri tərəfindən birgə hazırlanan limitli sayda fiziki və rəqəmsal hədiyyələr təqdim olunacaq.
Sözügedən nömrədə bir gecəlik qonaqlamanın qiyməti təxminən 480 000 von (təxminən 615 AZN) təşkil edir.
