“Krafton” şirkəti “Subnautica” oyununun tərtibatçısı olan “Unknown Worlds” studiyasının bu yaxınlarda işdən çıxarılmış baş direktorunu vəzifəsinə bərpa etməyə məcbur edilib. Bu qərar, naşirin oyunun uğurlu göstəricilərinə görə vəd edilmiş bonusları ödəməmək üçün ChatGPT-dən istifadə edərək yollar axtardığı ifşa olunduqdan sonra verilib.
“Krafton” 2021-ci ildə “Unknown Worlds” studiyasını satın almışdı. Razılaşmaya əsasən, əgər gələcəkdə “Subnautica 2” oyunu müəyyən maliyyə hədəflərinə çatsaydı, studiya heyətinə 250 milyon dollar məbləğində bonus ödənilməli idi.
Lakin məlum olub ki, “Krafton”un baş direktoru Çanqhan Kim (Changhan Kim) xərcləri azaltmaq və bu nəhəng bonusu ödəməkdən yayınmaq üçün strateji plan hazırlamaq məqsədilə ChatGPT-yə müraciət edib. “Layihə X” (Project X) adlı gizli əməliyyat çərçivəsində o, süni intellekt vasitəsilə müqaviləni pozmaq və ya studiya üzərində tam nəzarəti ələ keçirmək yollarını araşdırıb.
Bu planın bir hissəsi kimi, “Subnautica 2”-nin bazara çıxarılmasının qəsdən gecikdirilməsi və satış platformalarının məhdudlaşdırılması kimi taktikalar müzakirə edilib. Məqsəd oyunun müəyyən edilmiş müddət ərzində hədəf göstəricilərinə çatmasına mane olmaq olub.
Bundan əlavə, “Krafton” studiyanın üç təsisçisini — Çarli Klivlend (Charlie Cleveland), Maks Makqvayr (Max McGuire) və Ted Hill-i (Ted Gill) oyunun inkişafına “laqeyd yanaşmaqda” ittiham edərək işdən çıxarıb. Tərtibatçılar isə bu qərarın qanunsuz olduğunu və bonusları mənimsəmək məqsədi daşıdığını bildirərək məhkəməyə müraciət ediblər.
16 mart 2026-cı il tarixində Delaver ştatının hakimi “Krafton”un müqavilə şərtlərini pozduğuna və əməkdaşları əsassız yerə işdən kənarlaşdırdığına dair qərar çıxarıb. Məhkəmə Ted Hill-in baş direktor vəzifəsinə dərhal bərpa olunmasını tələb edib. O, həmçinin digər həmtəsisçiləri də geri qaytarmaq hüququ qazanıb.
“Krafton”un hərəkətləri studiyanın iş ahəngini pozduğu üçün hakim komandanın 250 milyon dollarlıq bonusu qazanmaq müddətini 15 sentyabr 2026-cı il tarixinə qədər uzadıb.
“Krafton” rəhbərliyi isə ittihamları rədd edir, məhkəmə qərarı ilə razılaşmır və növbəti hüquqi addımları nəzərdən keçirir.
