“Team Liquid” kollektivi “Apex Legends Global Series” (ALGS) 2026 Split 2 Playoffs turnirinin qalibi adını qazanıb. Noyabrın 1-də ABŞ-nin Las-Veqas şəhərində baş tutan gərgin final mərhələsində komanda 91 xal toplayaraq çempionluq kubokunu başı üzərinə qaldırıb. Bu qələbə kollektivə 2 milyon dollarlıq ümumi mükafat fondundan 600 000 ABŞ dolları qazandırıb.
“Match Point” dramı və “Storm Point”də həlledici qarşılaşma
Turnirin həlledici mərhələsi xüsusi “Match Point” reqlamenti ilə keçirilib. Qaydalara əsasən, komandaların çempionluq uğrunda mübarizə hüququ qazanması üçün ən azı 50 xal həddini keçməsi tələb olunurdu. Lakin bu həddə çatmaq avtomatik qələbə gətirmirdi — komanda həmin baryeri aşdıqdan sonra növbəti matçlardan birində mütləq birinci yeri tutmalı idi.
“Team Liquid” final seriyası boyu xallarını stabil şəkildə artıraraq artıq yeddinci matçda “Match Point” həddinə çatıb. Eyni zamanda onların əsas rəqibləri sayılan “Team Vision” və “Forged Wolves” da bu mərhələyə çataraq yarışı vaxtından əvvəl bitirmək imkanı qazanmışdı.
Səkkizinci oyunda üçüncü olan “Team Liquid” üçün “Storm Point” xəritəsində keçirilən doqquzuncu oyun taleyüklü olub. Son zonadakı mövqe üstünlüyündən məharətlə istifadə edən kollektiv əvvəlcə “Team Vision”u kənarlaşdırıb, yekun qarşıdurmada isə “RRQ” komandasına qalib gələrək çempionluğunu rəsmiləşdirib.
Tarixi heyətin tərkibi: Ris “Zer0” Perri, Nikolas “Sikezz” Odom, Nataniel “Panic” Artur və baş məşqçi Karim “Kapreme” Mardambey.
Final mərhələsinin yekun turnir cədvəli
Doqquz qarşılaşmanın yekununda ilk onluq belə sıralanıb:
- Team Liquid — 91 xal
- Team Vision — 80 xal
- Forged Wolves — 76 xal
- Aurora — 71 xal
- Alliance — 65 xal
- White Grim Reaper — 64 xal
- Wolves Esports — 61 xal
- Ninjas in Pyjamas — 53 xal
- Crazy Thieves — 48 xal
- Team WaR — 48 xal
“Team Liquid” ən yaxın izləyicisi “Team Vision”u 11 xal qabaqlayıb.
Mükafat fondunun bölgüsü
Dünyanın 40 ən güclü komandasının mübarizə apardığı yarışın 2 milyon dollarlıq fondundan ən böyük payı ilk üç pillənin sahibləri əldə ediblər:
- Team Liquid: 600 000 dollar;
- Team Vision: 300 000 dollar;
- Forged Wolves: 200 000 dollar.
Digər finalçılar da göstərdikləri nəticələrə və tutduqları pillələrə müvafiq olaraq mükafatlandırılıblar.
