Böyük Britaniyanın paytaxtı Londonda yerləşən məşhur “Selfridges” univermağı “Grand Theft Auto VI” oyununun təqdimatı şərəfinə genişmiqyaslı tematik məkan açıb. Pop-up zonası qısa zamanda böyük maraq dalğası yaradıb və təqdim olunan bütün rəsmi suvenir və geyim məhsulları (merchandise) həm univermağın özündə, həm də onlayn mağazada tamamilə satılaraq tükənib.
Qurulan xüsusi məkanın əsas vizual elementi və diqqət mərkəzi “GTA” franşizasındakı əfsanəvi “Grotti Cheetah” modeli formasında dizayn edilmiş orijinal “Ferrari Testarossa” avtomobili olub. Nəqliyyat vasitəsi Vays-Siti şəhərinin vizual estetikasına uyğun olaraq xarakterik neon çəhrayı və açıq mavi rənglərlə boyadılıb. Məlumata görə, avtomobil “GTA 6″nın qlobal marketinq kampaniyası çərçivəsində xüsusi olaraq Mayami şəhərindən Londona gətirilib.
Qeyd edək ki, “Cheetah” modeli oyunçulara yaxşı tanışdır — bu avtomobil “GTA 3″dən başlayaraq seriyanın demək olar ki, bütün buraxılışlarında yer alıb.
“Selfridges” nümayəndələri bildiriblər ki, nümayiş etdirilən “Grotti Cheetah” sadəcə vitrin bəzəyi deyil və onu birbaşa satın almaq mümkündür. Eksklüziv kolleksiya avtomobilinin satış qiyməti 1 milyon funt-sterlinq (təxminən 1.3 milyon ABŞ dolları) təşkil edir.
