“Rainbow Six Siege”ə “DOOM” krossoveri, “Doc”un tam yenilənməsi və yeni silah gəlir: “Operation Vital Signal” detalları

0 comments 0 views

“Ubisoft” şirkəti “Rainbow Six Siege” taktiki atıcı oyununun 11-ci ilinin 4-cü mövsümü — “Year 11 Season 4: Operation Vital Signal” yeniləməsinin əsas təfərrüatlarını ictimaiyyətə təqdim edib. Genişmiqyaslı yeniləmə 1 dekabr tarixində bütün platformalarda istifadəyə veriləcək.

Operator yenilənmələri və yeni MBZ-19 silahı

Yeni mövsüm müdafiə tərəfinin dəstək operatorlarına əsaslı dəyişikliklər gətirir. Ən mühüm yenilik Doc operatorunun tam yenidən işlənməsi (rework) olacaq: onun klassik Stim Pistol tapançası “E-Heal Monitor” adlı yeni cihazla əvəz ediləcək. Məsafə məhdudiyyəti olmayan bu texnologiya müttəfiqlərin sağlamlıq ehtiyatını bütün xəritə üzrə izləməyə, onları müalicə etməyə və hətta yaralı komanda yoldaşlarını divarların və digər maneələrin arxasından ayağa qaldırmağa imkan verəcək, lakin Thatcher bu qurğuya qarşı əks-təsir göstərə biləcək. Bununla yanaşı, Thunderbird operatorunun Kona Station qurğusu da təkmilləşdirilərək dörd stansiyaya sahib olacaq, daha sürətli yenidən dolacaq və müttəfiqlərin üzərindən karıxma (stun) ilə kontuziya (concussion) effektlərini aradan qaldıra biləcək.

Dəyişikliklər silah arsenalına da şamil olunub. Belə ki, Jäger, Warden və Thunderbird operatorlarının seçiminə MBZ-19 adlı yeni tapança-pulemyot əlavə ediləcək. Bu silah 64 gülləlik maqazin tutumuna, 33 vahid zərər (damage) göstəricisinə və dəqiqədə 750 atəş tempinə malikdir.

“Bank” xəritəsi və “Testing Grounds” sınaqları

“Ubisoft” oyun prosesini balanslaşdırmaq məqsədilə xəritə və müdafiə mexanikalarında da yeniliklər hazırlayıb. Mövsüm çərçivəsində “Bank” xəritəsi yenilənəcək — burada hücum tərəfi üçün yeni giriş nöqtəsi, əlavə xarici sığınacaq (cover) və ikinci mərtəbədəki müdafiə mövqelərində struktur dəyişiklikləri tətbiq olunacaq. Bundan əlavə, xüsusi “Testing Grounds” rejimində divarın yalnız yarısını örtən yarım-möhkəmləndirmə (Half-Reinforcements) mexanikası test ediləcək. Bu eksperimental mexanikanın sınaq mərhələsi 19 yanvar – 2 fevral tarixlərində keçiriləcək.

Reytinq formatları, kross-platforma dəstəyi və “DOOM” krossoveri

Rəqabətli oyun təcrübəsini yeniləmək üçün reytinq matçlarında iki ayrı format tətbiq olunacaq: tək oyunçular və cütlüklər üçün Solo/Duo, həmçinin 1, 2, 3 və ya 5 nəfərlik heyətlər üçün nəzərdə tutulan Ranked Flex rejimləri oyuna əlavə ediləcək, dörd nəfərlik qruplar isə reytinq oyunlarına buraxılmayacaq. Eyni zamanda, “Rainbow Six Siege”ə platformalararası vahid dost siyahısı və “PlayStation”, “Xbox” və PC oyunçularının birlikdə ortaq qruplar yaratmaq funksiyası gətiriləcək.

Sonda “Ubisoft” şirkəti gələcək “DOOM” krossoverini də rəsmən təsdiqləyib. Yayımlanan tizerdə əfsanəvi Doom Slayer obrazı nümayiş etdirilib və görünən odur ki, bu unikal dəst Tachanka operatoru üçün nəzərdə tutulub.

Bunlar da xoşunuza gələ bilər

Şərh yazın