Sony rəsmi olaraq PlayStation 5-i brend tarixində ən uğurlu konsol nəsli elan edib. Bu barədə Sony Interactive Entertainment-in CEO-su Hideaki Nişino Tokyo Game Show tədbirində açıqlama verib.
Rekord gəlirlər
Onun sözlərinə görə, Sony Game & Network Services bölməsi 2020-ci ildən bu yana artıq $136 milyard gəlir əldə edib. Bu göstərici şirkətin əvvəlki bütün konsollarını geridə qoyub:
- PS4 dövrü – $107 mlrd
- PS3 dövrü – $71 mlrd
- PS2 dövrü – $44 mlrd
- PS1 dövrü – $24 mlrd
Nişino qeyd edib ki, söhbət yalnız PS5 satışlarından getmir, bu müddətdə əldə olunan bütün G&NS gəlirlərini əhatə edir.
Satış və populyarlıq
Qiymət artımlarına baxmayaraq (ABŞ-da +$50 avqust ayında), PS5-in populyarlığı artır. 30 iyun 2025-ə qədər 80,3 milyon konsol satılıb. Müqayisə üçün, PS4-ün ümumi satışları 117,2 milyon təşkil edir.
Nişino bildirib:
“Biz inanırıq ki, PlayStation yalnız cihaz və oyun deyil, tam təcrübədir. PlayStation Store daim inkişaf edir, oyunçular və yaradıcılar üçün yeni imkanlar açır”.
Gələcəyə baxış
SIE rəhbəri, həmçinin, dünya üzrə yapon oyunlarına tələbatın artdığını vurğulayıb və Sony-nin bu məzmunu daha geniş auditoriyaya təqdim etməkdə mühüm rol oynayacağını söyləyib. Şirkət hələlik növbəti nəsil barədə planları açıqlamayıb, lakin şayiələrə görə PS5-dən sonra həm yeni ev konsolu, həm də portativ cihaz təqdim oluna bilər.
2025-ci ilin PS5 üçün ən yaxşı 25 oyunu (IGN versiyası)
Elden Ring, Baldur’s Gate 3, Metaphor: ReFantazio, God of War Ragnarok, Final Fantasy VII Rebirth, Astro Bot, Persona 5 Royal, The Last of Us Part I & II Remastered, Marvel’s Spider-Man 2, Cyberpunk 2077, Resident Evil 4 Remake, Ghost of Tsushima Director’s Cut, Horizon Forbidden West və digərləri siyahıya daxildir.
