“Spirit” kibersport təşkilatı məşqçi heyətinin strukturunu yenilədiyini rəsmən elan edib. Sergey “hally” Şavayev baş məşqçi vəzifəsinə geri dönərək bütün layihəyə rəhbərlik edəcək. O, daha əvvəl sağlamlıq problemlərinə görə müvəqqəti olaraq işdən uzaqlaşdığı dövrdə özünü “IEM Rio” və “PGL Astana” turnirlərində əvəz edən Dmitri “S0tF1k” Forostyanko ilə tandem şəklində çalışacaq.
“Spirit”in brend direktoru sosial şəbəkələrdə yeni idarəçilik sistemi barədə ətraflı məlumat verərək bildirib ki, komandanın ümumi oyun fəlsəfəsini — “onun CS vizyonunu” məhz “hally” müəyyənləşdirəcək. “S0tF1k” isə daha çox mikroməqamlar, fərdi strategiyalar, mexanika və qumbaralardan düzgün istifadə prinsiplərinə cavabdeh olacaq. O, həmçinin uzunmüddətli perspektivdə rəsmi matçlar zamanı komandanın arxasında məhz “hally”nin dayanacağını da təsdiqləyib.
“IEM Cologne Major 2026” öncəsi gözlənilməz böhran
Lakin komandanın mübarizəyə birbaşa ikinci mərhələdən başlayacağı IEM Cologne Major 2026-nın startında “Spirit” hər iki məşqçisinin köməyindən məhrum olacaq. Belə ki, Dmitri “S0tF1k” Forostyanko Şengen vizası ala bilməyib, Sergey “hally” Şavayev isə qəfildən kəskin xəstəliyə görə təcili xəstəxanaya yerləşdirilib.
Klubun rəsmi bəyanatında qeyd olunur: “Sergeyin tezliklə sağalacağını və turnirin sonrakı mərhələlərində komandaya qoşula biləcəyini gözləyirik”.
Hələlik hər iki məşqçi Almaniyadakı heyətə distant (məsafədən) olaraq dəstək verməyə çalışacaq.
Komandadan gözləntilər və “S0tF1k” effekti
Bu yeni məşqçi duetinin debütü məhz Almaniya səhnəsində baş tutmalı idi. “Spirit” komandası “S0tF1k”ın müvəqqəti rəhbərliyi altında son dövrlərdə göstərdiyi yüksək performans sayəsində turnirin əsas favoritlərindən biri hesab olunur. Komanda onun rəhbərliyi ilə 9 aylıq kuboksuzluq seriyasına son qoyaraq “PGL Astana” turnirinin qalibi olmuş, həmçinin “IEM Rio”nun finalında yalnız “Vitality”yə uduzaraq gümüş medal qazanmışdı.
Sözügedən turnirlərdən sonra “S0tF1k”ın əsas komandadakı gələcəyi analitiklər arasında geniş müzakirə obyektinə çevrilmişdi. Mütəxəssislər onun komandanın qumbaralardan istifadə taktikasındakı müsbət təsirini xüsusi vurğulayır, oyunçular isə onun “bir çox mühüm səhvləri aradan qaldırmağa” kömək etdiyini və oyunun baza aspektlərini əhəmiyyətli dərəcədə təkmilləşdirdiyini bildirirlər.
