State of Unreal 2025 tədbiri çərçivəsində Polşanın məşhur oyun studiyası CD Projekt RED “The Witcher 4” adlı oyununun ikinci rəsmi treylerini təqdim edib. Yeni video həm vizual baxımdan, həm də texniki baxımdan oyunsevərlərdə böyük maraq doğurub.

Treylerdə təqdim olunan kadrlar PlayStation 5 konsolunda çəkilib və ray tracing texnologiyası ilə 60 FPS dəstəyi təmin edilib. Bu da oyunun həm detallı vizual effektlərini, həm də axıcı oynanma təcrübəsini nümayiş etdirir.

Oyunun hadisələri Kovirdə baş verəcək

CDPR nümayəndələrinin açıqlamasına görə, oyun Şimal krallıqlarından biri olan Kovir ərazisində baş verəcək. Bu bölgə Praxenna körfəzi ilə Əjdaha dağları arasında yerləşir və yeni sərgüzəştlər üçün zəngin imkanlar yaradır.

Oyun dünyasının sevilən qəhrəmanı Ciri bu dəfə Kelpi adlı atla səyahət edəcək. Realist at sürmə mexanikası üçün isə Unreal Engine 5 texnologiyasından istifadə olunub.

Canlı ekosistem və inkişaf etmiş NPC sistemi

Yaradıcılar yeni oyunda canlı və dinamik təbiət mühiti yaratmağa çalışdıqlarını bildiriblər. Bu məqsədlə Nanite Foliage texnologiyası tətbiq olunub, hansı ki, bitki örtüyünü daha real göstərməyə imkan verir.

NPC-lərlə bağlı da ciddi dəyişikliklər var. Göstərilən kəndlərdən birində eyni anda 300-dən çox NPC mövcuddur. Hər bir personajın öz davranış qaydası, animasiyası və günlük rutini var. Bu da oyunun dünyasını daha real və interaktiv edir.

Ubisoft bu il üçün planlaşdırılan ənənəvi Ubisoft Forward yay təqdimatının keçirilməyəcəyini rəsmi şəkildə elan edib. Şirkət bunun əvəzində IGN Live və PC Gaming Show kimi üçüncü tərəf tədbirlərində iştirak edəcəyini açıqlayıb.

Ubisoft-un bu qərarı bir çox azarkeş üçün sürpriz olub – illərdir yay mövsümündə keçirilən bu təqdimatlar şirkətin əsas oyun anonsları ilə yadda qalırdı. Lakin Game File-a verdiyi açıqlamada Ubisoft-un nümayəndəsi bildirib ki, şirkət auditoriya ilə yeni ünsiyyət yolları axtarır. Analitiklərin fikrincə, bu addım Ubisoft-un marketinq strategiyasının dəyişməsi ilə bağlıdır.

Ubisoft-un əsas layihələrindən olan Assassin’s Creed Shadows üçün yeni Claws of Iwaji əlavəsi, eləcə də Prince of Persia: The Sands of Time Remake, Anno 117: Pax Romana, The Division Resurgence və Rainbow Six Mobile oyunları üzərində işlər davam edir.

Şirkət həmçinin Assassin’s Creed Shadows-un iki illik dəstəyə sahib olacağını və 2026-cı ildə kooperativ rejimə keçəcəyini planlaşdırır.

Ubisoft onu da vurğulayıb ki, bütün anons edilmiş oyunlar 2026-cı ilin 31 martına qədər, yəni cari maliyyə ili ərzində satışa çıxarılacaq. Azarkeşlərə bu layihələrlə bağlı alternativ tədbirləri izləmək, yaxud Ubisoft tərəfindən təşkil ediləcək fərdi təqdimatları gözləmək tövsiyə olunur.

Nintendo şirkəti özünün məşhur eksklüziv layihələrinə genişmiqyaslı texniki yeniləmələr təqdim edib. Bu addım, 5 iyun tarixində satışa çıxacaq yeni nəsil Switch 2 konsoluna hazırlıq çərçivəsində atılıb.

Yenilənmiş versiyalar artıq yükləməyə açıqdır. Oyunçular yeni konsolu əldə etdikdən sonra bu dəyişikliklərdən tam istifadə edə biləcəklər. Əsas diqqət qrafika keyfiyyətinə, kadr tezliyinin sabitliyinə və kooperativ imkanlara yönəlib.

Əsas yeniliklərdən bəziləri:

• Arms: HDR dəstəyi və artırılmış kadr tezliyi
• Big Brain Academy: 4 nəfərlik multiplayer rejimi
• Captain Toad: kooperativ oynama imkanı

Əfsanəvi layihələr – New Super Mario Bros. U Deluxe, Pokémon Scarlet & Violet, Super Mario Odyssey və The Legend of Zelda: Link’s Awakening – vizual baxımdan nəzərəçarpacaq dərəcədə yenilənib. Artıq bu oyunlar sabit 60 FPS ilə oynanır və daha aydın görüntü təklif edir.

Pokémon Scarlet & Violet artıq daha axıcı

Xüsusilə Pokémon Scarlet & Violet oyunundakı dəyişikliklər diqqət çəkir. İlk yayımlanan gameplay görüntüləri qrafikadakı irəliləyişləri və oyun prosesinin daha axıcı olduğunu nümayiş etdirir. Qeyd edək ki, bu yeniliklər yalnız texniki səviyyədədir – oyun məzmununa hər hansı əlavə edilməyib.

Pulsuz yeniləmələr

Nintendo bütün təkmilləşdirmələrin pulsuz təqdim olunduğunu vurğulayır. Oyunçular artıq sahib olduqları klassik oyunları heç bir əlavə ödəniş etmədən yenilənmiş formatda oynaya biləcəklər.

Ekspertlərin rəyi

İxtisaslaşmış analitiklər Nintendo-nun bu qərarını müdrik addım hesab edirlər. Təkcə çözünürlüyü artırmaqla kifayətlənməyən şirkət, oyunların orijinal üslubunu qoruyaraq onları müasir texniki tələblərə uyğunlaşdırıb. Bu da Switch 2-nin debütü ərəfəsində istifadəçilər üçün daha cəlbedici təcrübə vəd edir.

Məşhur Hitman seriyasının müəllifləri olan IO Interactive studiyası öz növbəti layihəsini rəsmi olaraq elan edib. Yeni oyun — 007 First Light — dünya şöhrətli casus Ceyms Bondun gənclik illərindən bəhs edəcək.

Studiyanın paylaşdığı rəsmi məlumatda qeyd edilir:

“007 First Light — IO Interactive tərəfindən hazırlanıb yayımlanan tamamilə yeni Ceyms Bond oyunudur. Oyunçular dünyada ən sevilən agentin rolunu oynayaraq onun ’00 agenti’ statusuna yüksəliş yolunu izləyəcəklər. Bu tamamilə orijinal bir başlanğıc hekayəsidir.”

Hazırda təsdiqlənmiş platforma Nintendo Switch 2-dir. Bu haqda məlumat ilk dəfə Switch 2 Direct təqdimatında verilmişdi. Lakin ilkin anons zamanı bildirildiyi kimi, oyun digər əsas platformalarda da gözlənilir — bu, PlayStation və Xbox istifadəçiləri üçün də sevindirici xəbərdir.

IO Interactive bu həftə ərzində oyunun tam təqdimatını edəcəyini və eksklüziv görüntüləri paylaşacağını açıqlayıb. Bu təqdimat zamanı oyun prosesi, süjet detalları və buraxılış tarixi ilə bağlı daha ətraflı məlumat veriləcək.