Esports Charts portalı, CS2 üzrə keçirilən StarLadder Budapest Major 2025 turnirinin ziyarətçiləri arasında maraqlı bir araşdırma apararaq onların oyun seçimlərini analiz edib. Tədqiqat nəticəsində məlum olub ki, Counter-Strike auditoriyası geniş oyun ekosisteminə dərindən inteqrasiya olunub və “yalnız bir oyun” stereotipini darmadağın edir.
Məlumatlara görə, respondentlərin yalnız 3,4%-i maraq dairəsini yalnız CS ilə məhdudlaşdırır. Qalan 96,6% kütlə isə aktiv şəkildə digər oyun layihələri ilə maraqlanır. Ən böyük auditoriya kəsişməsi 37% ilə League of Legends (LoL) oyununda qeydə alınıb. Bu göstərici sübut edir ki, peşəkar kiberidman icması janr fərqlərinə (şuter və ya MOBA) baxmayaraq, böyük Tier-1 intizamlar ətrafında birləşir.
Maraqlı məqamlardan biri də budur ki, Minecraft (23,6%) və PUBG (17,8%) populyarlıq baxımından CS-in birbaşa rəqibi olan Valorant (16,2%) oyununu qabaqlayıb. Eyni zamanda, Valorant və Dota 2 ziyarətçilər arasında təxminən eyni maraq səviyyəsinə malikdir.
Esports Charts mütəxəssisləri qeyd edirlər ki, bu cür müxtəliflik qeyri-endemik brendlər (oyun sənayesi ilə birbaşa bağlı olmayan şirkətlər) üçün geniş imkanlar yaradır. Çünki orta statistik kiberidman azarkeşinin profili standart təsəvvürlərdən qat-qat universaldır və onlarla müxtəlif platformalar üzərindən əlaqə qurmaq mümkündür.
