“Fortnite Crew” xidməti aylıq təqdim olunan V-baks (V-Bucks) miqdarını azaldır. Bu isə o deməkdir ki, abunəçilər eyni qiymətə daha az virtual valyuta əldə edəcəklər.

“Epic Games” şirkəti abunəçilərə göndərdiyi rəsmi bildirişdə qeyd edib ki, 6 iyun 2026-cı il tarixindən başlayaraq aylıq V-baks hesabı 1000-dən 800-ə düşəcək. Sözügedən tarixə qədər abunəliyini yeniləyən istifadəçilər hələ də tam 1000 V-baks əldə edə biləcəklər. Maraqlıdır ki, bu dəyişikliyə rəğmən abunə haqqında hər hansı bir endirim nəzərdə tutulmayıb.

Xatırladaq ki, “Fortnite Crew” aylıq 11,99 dollar qiymətində olan xüsusi abunəlik xidmətidir. Bu paketə hər ay verilən virtual valyuta ilə yanaşı, cari mövsümün Döyüş Bileti (Battle Pass) və eksklüziv kosmetik əşyalar daxildir.

V-baksların sayının azaldılması faktiki olaraq bu abunəliyi oyunçular üçün 20% daha az sərfəli edir. Qeyd edək ki, bu, “Epic Games”in son zamanlar həyata keçirdiyi ilk belə addım deyil. Cari ilin mart ayında V-baks paketlərinin qiyməti 25%-ə qədər artmış, həmçinin Döyüş Biletinin oyunçulara xərclədikləri vəsaitdən daha çoxunu geri qazanmağa imkan verən bəzi bonus mükafatları ləğv edilmişdi.

“Fortnite” oyun rejimlərinin siyahısını genişləndirməyə davam edir. Artıq aprelin 9-da rəsmi “Arenas Boxfights” rejimi oyunçuların ixtiyarına veriləcək. Bu rejim “Creative” (Yaradıcılıq) bölməsinin ən populyar formatlarından birinə əsaslanır.

Qeyd edək ki, layihənin ilkin mərhələsində “Save the World” əsas rejim kimi planlaşdırılsa da, oyunçuların marağı sürətlə “Battle Royale” (Kral Döyüşü) tərəfə yönəlib. Məhz bu səbəbdən “Epic Games” diqqətini tamamilə bu istiqamətə yönəldərək oyuna süjet xətti, “Battle Pass” (Döyüş Bileti) sistemli mövsümlər və daim dəyişən xəritə əlavə edib.

Zamanla tərtibatçılar müxtəlif tapşırıqlar və mükafatlar təqdim edən müvəqqəti rejimlər işə salıblar. Sonradan bu təşəbbüs “Fortnite Festival”, “Rocket Racing” və “LEGO Fortnite” kimi tamhüquqlu rejimlərə çevrilib. Lakin bütün rejimlər eyni dərəcədə populyarlıq qazana bilmədiyi üçün bəzi məzmunlar tezliklə platformadan silinəcək.

Yeni rejim köhnə məzmunları əvəzləyəcək

“Rocket Racing”, “Ballistic” və “Fortnite Festival”dakı “Battle Stage”in ləğv edilməsinə baxmayaraq, oyunçulara maraqlı alternativ təklif olunur. Rəsmi məlumata görə, aprelin 9-da start götürəcək “Arenas Boxfights” 16 nəfərlik formatda 1v1 və 2v2 matçlar təqdim edəcək. Qələbə qazanmaq üçün 15 raundu birinci tamamlamaq tələb olunacaq.

“Boxfights” formatı oyun icmasına çox yaxşı tanışdır. Bu, xüsusilə aktiv tikinti şəraitində yaxın məsafəli döyüş bacarıqlarını sınağa çəkmək üçün ideal məkandır. Əvvəllər oxşar təcrübəni yalnız yaxın məsafəli silahların istifadə edildiyi “Close Quarters” rejimi təklif edirdi.

Mükafatlar və xüsusiyyətlər

Yeni rejimdə dəyişən silah dəstləri, reytinq sistemi və xüsusi olaraq hazırlanmış xəritələr yer alacaq. Tərtibatçılar oyunçuları bu yeniliyi sınaqdan keçirməyə həvəsləndirmək üçün xüsusi tapşırıqlar da hazırlayıblar. Bu tapşırıqları yerinə yetirən istifadəçilər “Builder’s Crest” və “Cracked Blueprint” kimi pulsuz kosmetik əşyalar qazanacaqlar.

Oyunun növbəti yenilənməsi aprelin 16-da planlaşdırılır və məhz həmin tarixdə bəzi köhnə rejimlər ləğv ediləcək. Lakin “Arenas Boxfights”ın işə düşməsini çox gözləmək lazım gəlməyəcək. Rejimin aprelin 9-da, yerli vaxtla axşam saatlarında istifadəyə verilməsi gözlənilir.

“Resident Evil” oyun seriyasının baş qəhrəmanlarından biri olan Leon S. Kennedinin yeni kolleksiya heykəlcikləri internetdə geniş marağa səbəb olub. Heykəlciklərin bu qədər müzakirə olunmasına səbəb istehsalçının personaj üçün seçdiyi qeyri-adi geyim tərzi və pozadır.

Hazırda ön sifariş üçün əlçatan olan bu fiqurlarda Leonun stula bağlanmış bir neçə fərqli variantı təqdim olunur: o, həm ənənəvi geyimində, həm də yalnız çimərlik geyimində (plavki) təsvir edilib.

Məhsulun təsvirinə əsasən, heykəlciklər 1/4 və 1/6 miqyasında istehsal olunur. Qiymətlər isə seçilən versiyadan asılı olaraq 46 dollar ilə 370 dollar arasında dəyişir.

Hazırda bu kolleksiya nümunələrinin “Capcom” şirkəti tərəfindən rəsmən lisenziyalaşdırılıb-lisenziyalaşdırılmadığı məlum deyil. Saytdakı məhsul təsvirində oyun seriyasının yaradıcıları haqqında heç bir qeyd yoxdur və reklam materiallarında şirkətin loqosu əks olunmayıb. Bu isə böyük ehtimalla məhsulun lisenziyasız olduğunu göstərir.