“Insomniac Games” studiyasının yeni oyunu “Marvel’s Wolverine”in ilk satış nəticələri bəlli olub. “Alinea Analytics” analitik şirkətinin qiymətləndirməsinə görə, döyüş oyunu satışa çıxdığı ilk üç gün ərzində 1.9 milyona yaxın nüsxə tirajla satılıb.
Məlumatlara əsasən, oyun bu qısa müddətdə təxminən 130 milyon dollar ümumi gəlir gətirib. Satılan nüsxələrdən təxminən 1 milyonu rəqəmsal öncədən sifarişlərin, 22.9%-i isə fiziki disklərin payına düşüb. Qeyd etmək lazımdır ki, bu göstəricilər analitik təxminlərə dayanır — “Sony Interactive Entertainment” və “Insomniac Games” hələ ki rəsmi satış statistikasını dərc etməyib.
“Death Stranding 2″nin üstələnməsi və 2026-cı ilin rekordu
“Alinea Analytics”in hesablamalarına görə, “Marvel’s Wolverine” artıq “PS5” platformasındakı ümumi satış göstəricilərində “Death Stranding 2” oyununu geridə qoyub (müqayisə üçün: “Death Stranding 2″nin ümumi satışı 1.8 milyon nüsxə və 129 milyon dollar gəlir təşkil edib). Beləliklə, “Wolverine” satış tempi baxımından 2026-cı ildə “PlayStation Studios”un ən uğurlu yeni layihəsi olub.
Xatırladaq ki, “Marvel’s Wolverine” 15 sentyabr 2026-cı il tarixində eksklüziv olaraq “PlayStation 5” konsolu üçün işıq üzü görüb.
