Electronic Arts şirkəti “UFC” seriyasının altıncı oyununu rəsmən anons etdi. Yeni döyüş simulyatorunun bu ilin 19 iyun tarixində PlayStation 5 və Xbox Series X/S platformaları üçün satışa çıxarılması planlaşdırılır.
Oyunun standart versiyasının qiyməti $69.99 olacaq. Daha geniş imkanlar təklif edən “Ultimate Edition” isə $99.99 qiymətinə təklif ediləcək. Bu versiyanın əsas üstünlüyü oyunçulara 7 günlük erkən giriş imkanı verməsidir.
Üz qabığının ulduzları
Standart nəşrin üz qabığında UFC-nin orta çəkidə keçmiş və hazırda yarım-ağır çəkidə çempionluq kəmərini daşıyan ulduzu Aleks Pereyra (Alex Pereira) yer alacaq. “Ultimate Edition”ın üz qabığını isə MMA əfsanəsi, yarım-yüngül çəkidə keçmiş UFC çempionu Maks Hollouey (Max Holloway) bəzəyəcək.
“Ultimate Edition” nəşrinə aşağıdakılar daxildir:
- Fighter Pass: Səkkiz UFC əfsanəsi (ikisi dərhal, altısı isə daha sonra əlavə olunacaq).
- Expansion Pass: 2026-cı ilin qışında və 2027-ci ilin yayında çıxacaq iki böyük genişləndirmə paketi. Bura yeni oyun rejimi və digər əlavə məzmunlar daxil olacaq.
- VIP Pass: Beş döyüşçü görünüşü (skin), altı VIP kosmetik əşya, üç VIP emociya, həmçinin oyundaxili inkişaf və mükafatlar üçün daimi bonuslar.
- Rivalry Bundle: İki döyüşçü görünüşü və 500 UFC xalı.
EA-in verdiyi məlumata görə, istənilən versiyanı öncədən sifariş edən oyunçulara “Korean Zombie”, Mişa Teyt (Miesha Tate) və Leon Edvardsın (Leon Edwards) görünüşlərini ehtiva edən “Iconic Moments Bundle” dəsti hədiyyə olunacaq.
