Son günlər kiberidman və oyun ictimaiyyətində “Sony”nin yeni DRM (Digital Rights Management — Rəqəmsal Hüquqların İdarə Edilməsi) sistemi haqqında şayiələr geniş müzakirə olunur. Bu sistemin konsolların mütəmadi olaraq şəbəkəyə qoşulmasını tələb etdiyi iddia edilir. İstifadəçilərin bir qismi əvvəlcə bu məlumatın doğruluğuna şübhə etsə də, sonradan “PlayStation” tərəfi məlumatı qismən təsdiqləyib, lakin detallar hələ də tam aydın deyil.
Mövcud məlumatlara görə, “PlayStation 4” və “PlayStation 5” konsollarında oyunların rəqəmsal nüsxələrinin lisenziyasını hər 30 gündən bir yoxlayan mexanizm işə düşüb. Əgər konsol bu müddət ərzində internetə qoşulmazsa, təkrar qoşulma baş tutana qədər bəzi oyunlara giriş müvəqqəti məhdudlaşdırıla bilər.
Bu yenilik öz vəsaiti hesabına alınmış təkoyunçulu oyunlara belə məhdudiyyət qoyulmasını ədalətsiz hesab edən geymerlərin kəskin etirazına səbəb olub. Eyni zamanda dəqiqləşdirilir ki, bu dəyişiklik yalnız sistemin mart ayındakı yenilənməsindən sonra alınmış rəqəmsal nüsxələrə şamil olunur.
Daha sonra dəstək xidmətindən gələn digər bildirişlərdə qeyd olunub ki, 30 günlük müddət bitsə belə, oyunlar yenə də işə düşə bilər. “Sony”nin rəsmi və açıq bir mövqe nümayiş etdirməməsi qarışıqlığı daha da artırır. İstifadəçilərin bir hissəsi artıq şirkətin rəqəmsal buraxılışlarını boykot etməyə çağırır.
