“Hello Games” studiyası özünün ən böyük və məşhur layihəsi olan No Man’s Sky oyununun 10 illik yubileyini qeyd edir. Studiyanın rəhbəri Şon Mürrey oyun icmasına müraciət edərək layihənin 10 illik inkişaf yoluna yekun vurub.
Bu müddət ərzində oyun imkanlarını köklü şəkildə genişləndirən 40 iri pulsuz yenilənmə alıb. Oyuna baza tikintisi, ekzokraftlar, məskənlər, mexlər, ev heyvanları, canlı gəmilər və ekspedisiyalar əlavə olunub. Həmçinin oyun Switch, Xbox, VR, PSVR, PS5, Xbox Series və Switch 2 daxil olmaqla demək olar ki, bütün aktual platformalarda buraxılıb.
Rekord Göstəricilər Və “COSMOS” Yenilənməsi
Mürreyin sözlərinə görə, 10 il ərzində “No Man’s Sky” kainatında on milyonlarla oyunçu yüz milyonlarla saat vaxt keçirib. Buna baxmayaraq, oyun aləmindəki planetlərin 1%-dən də az hissəsi kəşf edilib.
2026-cı ildə oyun buraxılış günündən bəri ən yüksək eyni vaxtda oynayan oyunçu göstəricisini qeydə alıb. Bundan əlavə, layihə TGA və BAFTA tərəfindən “Ən Yaxşı İnkişaf Edən Oyun” (Best Evolving Game) mükafatlarına layiq görülüb.
“İstənilən oyun üçün 10 illik həddə çatmaq əlamətdar hadisədir və hesab edirəm ki, No Man’s Sky üçün bu, xüsusilə vacibdir. Bu, komandamızın və oyunçularımızın sadiqliyinin sübutudur. Pərdəarxasında biz aktiv şəkildə növbəti oyunumuz olan Light No Fire və No Man’s Sky üçün böyük planlar, o cümlədən ‘COSMOS’ adlı gələcək yenilənməmizin tizeri üzərində işləyirik.”
— Şon Mürrey
Uğursuz Startdan Tarixi Geri Dönüşə
“Hello Games” rəhbəri oyunun 2016-cı ildəki çətin və qalmaqallı startını da xatırladıb. Buraxılış zamanı texniki problemlərlə və gözləntilərin doğrultulmaması ilə bağlı kəskin tənqidlərlə üzləşən studiya, illərlə oyunu pulsuz şəkildə təkmilləşdirərək onu oyun sənayesinin ən böyük geri dönüş (comeback) hekayələrindən birinə çevirdi.
Hazırda “No Man’s Sky” Steam platformasında “Çox Müsbət” rəylərə sahibdir ki, bu da icmanın oyuna münasibətinin son 10 ildə necə köklü dəyişdiyini göstərir.
