“Riot Games” şirkəti 2024-cü ildə “Əfsanələr Zalı”nı (Hall of Legends) təsis etdikdən bəri hər il “League of Legends” kiberidman növünün tarixinə adını əbədi yazdırmış oyunçuları təltif edir. Bu günə qədər bu ali mükafata üç kult kiberidmançı layiq görülüb: Faker, Uzi və Caps.
Ən azı beş il birincidərəcəli liqalarda (LCK, LPL, LEC, TCL və s.) mübarizə aparmış həm aktiv, həm də keçmiş oyunçular “Əfsanələr Zalı”na namizəd ola bilərlər. Qalibi regional liqaların və kiberidman icmalarının nümayəndələrindən ibarət xüsusi münsiflər heyəti müəyyənləşdirir. Seçim zamanı oyunçuların beynəlxalq və regional titulları, kiberidmanın inkişafına töhfələri və rəqabətli metaya təsiri nəzərə alınır.
Prestijli statusla yanaşı, laureatlar maliyyə mükafatı da əldə edirlər. Oyunçuya və onun keçmiş komandalarına mövzulu döyüş biletlərinin (battle pass) və eksklüziv kosmetik əşyaların satışından əldə edilən ümumi gəlirin 30%-dən pay ayrılır. Qalan vəsait isə komandaların daha geniş qlobal ekosistemini dəstəkləməyə yönəldilir.
2024-cü il — Faker. Cənubi koreyalı midleyner Li “Faker” San Hyok gözlənildiyi kimi “Əfsanələr Zalı”na daxil edilən ilk oyunçu oldu. “İblis Kral” ləqəbi ilə tanınan kiberidmançı bu sahənin ən görkəmli siması hesab olunur. Onun aktivində “T1” komandasının heyətində qazanılmış fenomenal altı Dünya Çempionluğu titulu var (2013, 2015, 2016, 2023, 2024 və 2025-ci illər). Uğurları arasında həmçinin “Mid-Season Invitational”da iki qələbə (2016, 2017), Asiya Oyunlarının qızıl medalı (2022) və “Esports World Cup” titulu (2024) yer alır. “Riot Games” onun şərəfinə Ahri (Risen və Immortalized Legend) və LeBlanc (Risen Legend) çempionları üçün skinlər təqdim edib.
2025-ci il — Uzi. İkinci laureat tanınmış çinli atıcı (AD Carry) Çzyan “Uzi” Tszıhao oldu. Aqressiv oyun üslubu və “Qudurmuş it” ləqəbi ilə tanınan kiberidmançı bütöv bir oyunçu nəslinə ilham verib və dünyada “Nike” ilə müqavilə bağlayan ilk kiberidmançı olub. Uzi 2013 və 2014-cü illərdə finallara yüksələrək Dünya Çempionatında qələbənin bir addımlığında iki dəfə dayansa da, 2018-ci ildə “Royal Never Give Up” ilə MSI kubokunu qazanıb, həmçinin finalda Faker-i məğlub edərək Asiya Oyunlarının qızıl medalına sahib olub. Onun üçün Kai’Sa (Risen və Immortalized Legend) və Vayne (Risen Legend) çempionlarına skinlər yaradılıb.
2026-cı il — Caps. Rasmus “Caps” Vinter bu elit kluba qoşulan ilk avropalı oldu. Danimarkalı midleyner Asiya komandalarının tarixi üstünlük təşkil etdiyi bu aləmdə Qərb “League of Legends”inin əsas ulduzudur. 2019-cu ildən başlayaraq o, “G2 Esports” heyətində ümumilikdə 16 regional titul qazanaraq Avropa liqası LEC-in şəksiz liderinə çevrilib. Beynəlxalq arenada Caps “MSI 2019″un qalibi olub və iki il ard-arda Dünya Çempionatının finalında oynayıb (2018-ci ildə “Fnatic”, 2019-cu ildə isə “G2” ilə). Onun “Əfsanələr Zalı”na daxil edilməsi münasibətilə tərtibatçılar oyuna Tristana çempionu üçün skinlər (Risen və Immortalized Legend) əlavə ediblər.
