Beynəlxalq turnir operatoru “ESL” “Dota 2” üzrə keçirilən “DreamLeague Division 2 Season 5” (Series 5) turnirində çıxış edən Çinin “ZENITH” kollektivinin yarışdan kənarlaşdırıldığını rəsmən elan edib. Komanda danışılmış oyunlarda (“322”) iştirak etməkdə şübhəli bilinir.
Təşkilatçıların yaydığı rəsmi bəyanatda qərarın araşdırma yekunlaşana qədər qüvvədə qalacağı vurğulanıb:
“ZENITH komandası araşdırma başa çatana qədər Division 2 Season 5 turnirində iştirakdan müvəqqəti kənarlaşdırılıb. Bununla əlaqədar olaraq, onun bugünkü rəqibləri — “PlayTime” və “potn9ki” kollektivlərinə texniki qələbələr hesablanacaq. Kənarlaşdırma qərarı növbəti bildirişə qədər qüvvədədir və “ESL FACEIT Group”un bütün turnirlərinə şamil edilir.”
Uğursuz turnir statistikası və komanda heyəti
Diskvalifikasiya qərarına qədər “ZENITH” qrup mərhələsində beş qarşılaşma keçirmiş və onların hamısında məğlub olmuşdu. Ümumilikdə 10 xəritəni uduzan heyət turnir boyu yalnız bir xəritədə (“Team Synapse” komandasına qarşı matçda) qələbə qazana bilmişdi.
“ZENITH”in turnirdə çıxış edən heyəti:
- Ulu (Van Jakay)
- MamangDaya (Tri Daya Pamunqkas)
- Xiang yu (Li Lonqvu)
- CatYou (Tan Syaoley)
- Loyd (Loyd Yun Binq Tsze)
Onlayn formatda keçirilən “DreamLeague Division 2 Season 5” turniri 7–20 noyabr tarixlərini əhatə edir. Yarışın yekununda ilk üç pilləni tutan ən güclü kollektivlər nüfuzlu “DreamLeague Season 30” çempionatına birbaşa vəsiqə qazanacaqlar.
